القائمة الرئيسية

الصفحات

افضل ١٠ افكار ترفيهية ليوم الإجازة

                   افضل ١٠ افكار ترفيهية ليوم الإجازة 

افضل ١٠ افكار ترفيهية ليوم الإجازة

علي قد ما هتجتهد في جانب من جوانب حياتك من السبت للخميس.. علي قد ما هيكون قصاده مكافأة يوم الجمعة او يوم الاجازه ! ♥
أفكار للتسلية في البيت
استغلال الإجازة الصيفية
برنامج العطلة الصيفية
كيف أستفيد من الإجازة
كيفية استغلال الإجازة الصيفية للمراهقين
عمل الطلاب في العطلة الصيفية
استغلال الإجازة القصيرة
طرق للتسلية في المنزل

أهلاً بيك أيُها الشخص الطموح ف حلقة جديدة من "سلسلة التخطيط" وحلقة بعنوان (الخطة الأسبوعية ٦+١)

 انت عرفت في الفقرتين اللي فاتوا ازاي تعمل:
✅خطة اليومية (to do list) 
✅النهاردة هتعرف تخطط لأسبوعك بطريقة مُنظمة عشان تبدأ فيها من بكرة السبت، يلا بينا ✊

١- الجانب الديني 🌻

دي أهم حاجة تحطها ف خطة الأسبوع. 
وده لأن الدين هو اللي هيزود همتك، هو اللي هيشحنك طول الأسبوع من غير ما تبدأ اول يوم وتكسل تاني يوم. 
◾مطلوب منك الأسبوع ده تسمع سلسلة (إلتزمت ثُم ماذا، مكونة من خمس حلقات، كل حلقة ف يوم) 
أوعدك بعد السلسلة دي هتاخد قرارات مصيرية كان نفسك تاخدها من زمان ومش قادر... 
⚫هترجع تحفظ القرءان
⚫هتعرف تصحي تصلي الفجر
⚫هيكون عندك همة كبيرة تاخد كورسات وتطور من نفسك وتاخد خطوات حقيقية 
⚫هتعرف تقلل سوشيال ميديا 

٢- الجانب الصحي 🌻

مطلوب منك الأسبوع ده مثلا:-
- تشرب ٢ لتر ماية كل يوم. 
- تمنع سكر أبيض. 
- تعمل رياضة كل يوم نص ساعة حتي لو مشي. 
- تفطر كويس في بداية يومك. 
-تقلل عدد ساعات نومك ل ٧ ساعات، ومتخليهاش تزيد عن ٨ . 

٣- الجانب الشخصي 🌻

▪ حدد كتاب معين النهاردة وبطل عشوائية، واوعد نفسك انك تخلص الكتاب ده ف ٦ ايام 
لو كان مثلا ٣٠٠ صفحة قسمه ÷ ٦ = ٥٠ صفحة كل يوم
لو كان ١٥٠ صفحة قسمه ÷ ٦ = ٢٥ صفحة كل يوم
▪ حدد كورس واحد هيساعدك ف مجال شغلك أو مجال دراستك وإبدأ فيه، إلزم نفسك بحلقة منه كل يوم. 
▪ حدد مصدر واحد لتعلم اللغة الانجليزية وحط تارجت ٦ حلقات منه... سواء كان المصدر ده :
- Z American english
- Taleek
- كورس الجامعة الأمريكية المجاني المكون من ٨٠ حلقة. 
- المهم تحدد مصدر واحد بس + حدد مستواك في الانجليزي النهاردة قبل ما تبدأ. 

٤- الجانب الإجتماعي 🌻

علاقتك مع أهلك عاملة إيه؟ 
علاقتك مع قرايبك شكلها إيه؟ 
طب بالنسبة لصحابك إيه الوضع؟ 
▪ كل يوم حط لنفسك حاجة جديدة تعملها تحت بند "بر الوالدين"
▪ حدد ٦ أشخاص يهموك ف قايمة وكل يوم اتصل بواحد منهم واطمن عليه. 
▪ وانت راجع من برا هات حاجة حلوة لاخواتك. 
▪ شوف كده صحابك القُدامي وحدد معاهم خروجة مع بعض مرة يوم الجمعة الجاية. 
- بلاش تعيش حياتك وحيد.. رغم إنك مش وحيد! 

٥- الجانب المهني 🌻

سواء كنت بتشتغل، او كنت متطوع. 
خلي هدفك الأسبوع ده إنك تبدع في شغلك، تظهر، تبان، تنجح! 
- شوف الشطار اللي ف مجالك وخد منهم نصايح. 
- شوف زمايلك بيعملوا ايه وزود انت عليهم. 
- خليك طموح 💪

٦- الجانب الدراسي 🌻

فاضل شهر واحد علي بداية الدراسة. 
- اللي داخل جامعة 
- واللي داخل ٣ ثانوي 
- واللي اتخرج اصلا وعايز يحضر دراسات عُليا
كل واحد فيهم ليه وضع خاص (دورك الاسبوع ده تسمع كل يوم فيديو من علي اليوتيوب فيه نصايح للخطوة اللي انت مُقبل عليها، او كل يوم حدد شخص سبقك في الخطوة دي، وروح استشيره. 
بلاش تدخل مرحلة على عماك 🤏
كده يا عزيزي انت محدد كل يوم أساسيات وليها وقت محدد :
- درس ديني 
- حلقة من الكورس
- درس انجلش
- نص ساعة رياضة 
- ٢٥ صفحة قراءة من الكتاب
- شخص هتتصل بيه 
- تشتغل بإبداع ف شغلك وتعلّي علي زمايلك وتكون طموح
- فيديو نصايح /حد سبقك تستشيره 
انت كده معاك خطة مية مية تمشي عليهم ٦ ايام. 
طب ليه ٦ بس مش ٧ ؟ 
لسببين 🤏🤍

✅السبب الأول : 

عشان لو عقلك لاعبك وقالك بلاش تاخد درس النهاردة، او بلاش تقرأ النهاردة. 
او اي تقصير ف اي جانب في الخطة بتاعتك مخلصتهاش.. تقوم ضاحك علي عقلك وجاي يوم الجمعة تقوله (مش انت ملتزمتش، يبقي هتعوض كل اللي فات النهاردة) 
و صدقني عقلك هو اللي هيخليك تخلص اللي وراك اليوم بيومه بعد كده، عشان هيبقي عارف انه لو مخلصش اللي وراه هيتحرم من يوم الجمعة الترفيهي 🧘‍♀️
عامل عقلك كأنه طفل إذا تكرمت 🤹‍♂️

السبب التاني : 

عشان تحفز نفسك طول الاسبوع انك تخلص اللي وراك عشان في مكافأة قريبة المدي آخر الأسبوع. ♥☕
طب ازاي اعمل يوم ترفيهي بقا بعد ما التزمت بالخطة؟ 
خد يا سيدي ١٠ افكار ليوم جمعة ترفيهي محصلش. ♥
١- ال meditation.. شوفلك مكان هادي بيطل علي السما، وحضر مشروبك المفضل وسيب الفون بعيد خالص واقعد تأمل في السما، او اقعد اقرأ رواية شيقة في هذا الوقت الممتع. 
٢- اخرج مع صحابك القدامي
٣- البس اشيك طقم عندك وانزل اشتري حاجة نفسك فيها انشالله يكون عصير قصب او آيس كريم. 
٤- مارس هوايتك (الرسم، التلوين، التصميم، الكتابة، الخط، اي هواية) 
٥- اعمل نوع حلويات واستمتع بوقتك ده، او حضر انت عشا استثناءي. 
٦- اعمل براد شاي متين واقعد مع عيلتك اللي نسيت ملامحهم من كتر مانت مشغول (شغل بجد او سوشيال ميديا) 
٧- حضر فشار وعصير ويا سلام لو كان فيلم وثائقي او تحفيزي 
(منها تستمتع ومنها تستفاد) 
٨- شاور عظيم واهتمام بالنفس (إن لنفسك عليك حق) 
٩- تجديد ديكور اوضتك وتغيير نظامها. 
١٠- تلعب اي لعبة مسلية مع حد (شطرنج مثلا، الشطرنج جميل) 
اصحي كل يوم متحمس إنك تخلص اللي وراك في الخطة، وحفز نفسك بالمكافأة بتاعت يوم الجمعة 💆‍♂️🍹
واوعي تنسي فقرتي يا عزيزي يوم الجمعة الجاية الساعة ٤ ونص.
عشان هعلمك ازاي تعمل دفتر (استراتيجية الحياة) نوشن ورقي بس نينچا 😌🔥
أفكار للتسلية في البيت
استغلال الإجازة الصيفية
برنامج العطلة الصيفية
كيف أستفيد من الإجازة
كيفية استغلال الإجازة الصيفية للمراهقين
عمل الطلاب في العطلة الصيفية
استغلال الإجازة القصيرة
طرق للتسلية في المنزل
سلام 🚶
سلسلة_التخطيط_مع_ميرا
author-img
نسعي بإذن الله لمساعدة الجميع وتوفير بيئة تعلم متميزة لاكتساب مهارات مايكروسوفت اوفيس بمنهج معتمد والمهارات السلوكية وتطوير الذات وايضا تعلم المهارات الحياتية الازمه لعقل سوى ومطور وايجاد الوظيفه المناسبه للجميع وتلبيه احتياجات الجميع باذن الله

تعليقات