ازاي تفشل في اي خطه بتمشي عليها !
هنتعرف علي ...
ازاي تفشل في التخطيط للسنة الجديدة؟
تخيل معايا كده 😁 كوباية الشاي المتينة جمبك، نوت بوكس كتير وملونة، أقلام بترتر والساعة دقت 12 علشان تعلن عن بداية أول يوم في السنة الجديدة.
طبعاً أنت شفت كل فيديوهات علي محمد علي، أحمد أبو زيد وكل عظماء التخطيط قبلها ومستعد كويس.
بسم الله أول صفحة هتكتب أهدافك للسنة الجديدة:
- هتخرَّج بتقدير امتياز، اتعلم 4 لغات، هتجوز واشتري عربية آخر موديل، هبني شركتي .....
تيجي بعدها بشهر تقيس نجاحك متلاقيش حاجة، وتبدأ أغاني محمد محيي فى الخلفية.
طب كل ده حصل ليه؟
ببساطة علشان معرفتش تلعبها صح وتختار أولوياتك.
لكن متقلقش يا صديقي لسه في فرصة، هات نفس الورقة والقلم وأكتب قبل أي هدف S.M.A.R.T
أي ده
دا المقياس اللي تقدر تعرف بيه هل الهدف دا يناسبك وينفع يتحقق فعلاً ولا لأ، هناخد الهدف نعديه على كل فلتر من الحروف دي والبقاء للأقوى 😎
1-Specific/ محدد
أول هدف ليا أخس 5 كيلو جرام، مقولتش أنا عايزة أخس وخلاص أو أغير وزني؛ لأ أنا (حددت) بالظبط عايزة ايه.
2- Measurable/ قابل للقياس
لازم يكون في وسيلة تقدر تحدد بيها أتقدمت في الهدف قد ايه، في المثال اللي فات مثلاً هيكون عن طريق قياس الوزن ومتابعته؛ كمان قوة تحملك وإلتزامك فلازم تدرس كل الأبعاد.
3- Achievable/ قابل للتحقيق
لو أنت إنسان طبيعي مش كائن فضائي، هل ينفع تتقن 10 لغات في السنة؟
أكيد لأ!
وقت ما تكتب الهدف اسأل نفسك، هل هينفع أحقق الهدف المكتوب وفي الوقت اللي أنا حددته ولا لأ
يعني مينفعش أغير الهدف اللي فات وأقول (أنا عايزة أخس 20 كيلو في أسبوع)!
4- Realistic/ قابل للتحقيق
الهدف المكتوب لازم يكون عندك قدره تحققه وتوصله، لو قيسنا على الهدف السابق وكانت قدرتك على التمارين والإلتزام بالأكل الصحى ضعيفة، هتعمل إيه؟
تبدأ تطوّل المدة المحددة ليه وتحدد نظامك بدقة، هيتحول ل(أنا عايزة أخس 5 كيلو خلال 3 شهور)
5-Time-specific
هبدأ أزود على الهدف اللي كتبته وقت محدد وعقلاني اخلصه فيه -بلاش جو هخلص المنهج كله في نص ساعة 😅-
وبالتالي: أنا عايزة أخس 5 كيلو خلال التلت شهور اللي جايين، ويسلام لو كتبت التكنيكس جمبه زي مثلاً هشرب ماية أكتر وأتابع تمريني مع برنامج الكوتش.
وأخيراً هتصيغ أهدافك بالشكل ده وبصيغة المضارع:
-أنا بذاكر إنجليزي كل يوم ساعتين مع تطبيق ZAmerican English وهخلص أول ليڤل في مارس.
-أنا بقرأ كتاب وحي القلم للرافعى خلال شهر يناير بمعدل صفحتين يومياً.
• بعد ما تطبّق قاعدة الأهداف الذكية هتلاقي نفسك في الآخر مطلعتش غير ب6 أهداف وممكن أقل!
• هقولك حلو وخدها بالتدريج، وافتكر مبدأ (باريتو) اللي أثبته على مجالات حياتية وعملية كتير، وكل مرة بيلاقى إن 80% من النتائج سببها 20% -بس- من الأسباب.
• تابع وقتك ونجاحك بالورقة والقلم أو مع أبلكيشن زي Timecap أو Notion، بلاش تشتت نفسك علشان تكون الأول على العالم🙆♀️.
• وأهم نصيحة: متنخدعش بحوار تعدد المهام أو الmultitasking، كل ما تركز على مجموعة أهداف بسيطة بتخدم بعض كل ما هتنجز أكتر وتحقق غيرها.
وخلي حديث الرسول -صلّ الله عليه وسلم- مبدأ ليك: (ما قل وكفى خير مما كثر وألهى).
دلوقتي هطلب منك حاجة بسيطة تبدأ بيها السنة بطريقة جديدة🧘♀️، وهي هدف واحد بس تكتبه هنا بقاعدة SMART يكون أساسي تلتزم بيه حتى لو غيرت باقي الأهداف.
تعرفنا علي ....
خطط العام الجديد
نوايا السنة الجديدة
التخطيط للسنة الجديدة
أهداف السنة الجديدة
أهداف سنة 2022
مفهوم التخطيط pdf
تخطيط لسنة 2022
أهداف العام الجديد 2022