القائمة الرئيسية

الصفحات

ازاى تصمم بلانر لنفسك وتحقق أهدافك

                 ازاى تصمم بلانر لنفسك وتحقق أهدافك 

ازاى تصمم بلانر لنفسك وتحقق أهدافك

جاهز تعمل بلانر للسنه بطريقة جديدة وعملية تخليك تنجح 12 شهر 365 يوم! ♥

مراحل التخطيط الاستراتيجي pdf
التخطيط الاستراتيجي doc
مفهوم التخطيط الاستراتيجي pdf
التخطيط الاستراتيجي ppt
أنواع التخطيط الاستراتيجي
مفهوم التخطيط الاستراتيجي في التعليم
فوائد التخطيط الاستراتيجي
ماهو التخطيط الاستراتيجي

يبقي أهلاً بيك في حلقة جديدة من سلسلة التخطيط، وحلقة بعنوان : (اعمل بلانر بنفسك) 🤹‍♂️

متطلبات الخطه :- 

✅دفتر جديد وحلو وشيك

(اوعي تعمل خطة السنة في دفتر قديم، اشتري دفتر حلو) 

✅اسبوتلاينر، اقلام فسفوري ايا كان بتقول عليها اي، هات اربع الوان مختلفين. 

✅استيكي نوتس ملونة، متجيبش الدستة اللي كلها لون واحد، في دستة 100 قطعة، 4 الوان. 

✅علبة اقلام فلوماستر 

(معلش هنصرف النهاردة، ونحوش طول السنة جامد اوي) 

✅صمغ glue stick اللي لونه احمر من برا، عشان هتحتاج تلزق حاجات مهمة هنقول عليها. 

✅مسطرة - قلم رصاص، او سنون. 

✅مشروبك المفضل، وده مهم 

(نسكافيه - قهوة - شاي - او حتي سحلب عشان الجو ☕) 

ويلا بينا نخطط بذكاء ♥

بسم الله... 

⛔الصفحة الاولى:

هتكتب 6 اهداف واقعيين في كل جانب من حياتك فقط لا غير.. وهنقسمهم بعد كده متقلقش

مثلا -

١- الجانب الديني (هدفي اختم القران) 

٢- الجانب الصحي (يكون جسمي رشيق ورياضي) 

٣- الجانب الدراسي (اطلع الاول علي دفعتي، او علي الفصل، او حتي الاول علي الجمهورية لو انت في ثانوي) 

٤- الجانب العملي (اترقى في شغلي) 

٥- الجانب الاجتماعي (اصلح علاقاتي القديمة، وعلاقتي مع اهلي) 

٦- الجانب الشخصي (اقرأ 50 كتاب + 12 كورس + اوصل لمستوي فوق المتوسط E + اسمع 6 سلاسل دينية + اتعلم مهارة جديدة) 

❗خد بالك دي امثلة توضيحية للجوانب يا عزيزي يعني انت ارسم اهدافك حسب قدراتك وحياتك انت 🤍

❗وخد بالك بردو هنقسمهم علي 12 شهر، وبعدين، علي 4 اسابيع، وبعدين علي 7 ايام، فبلاش تشيل هم انك مش هتحقق الهدف لو كبير، هنقسمه مع بعض ان شاء الله ♥

⛔الصفحة التانية:

(تقنية التحصيل المُفيد والتخلص الذكي) 

ودي بتعمل فيها جدول . 

افقي 13 خانة 

رأسي 3 خانات

وده يصعُب شرحه، فانا استعنت بالتصاميم حجي في الصور اللي تحت البوست🏋

⛔الصفحة التالتة:

قائمة الكتب 

دي صفحتين 

الصفحة اليمين سيبها فاضية 

والشمال بردو هتسيبها فاضية 😂

اومال هتعمل اي؟ 

انت بس هتنسقهم.. 

الصفحة اليمين هتسميها (كُتب اودّ قراءتها) 

وتعمل جدول من غير تقسيم لطيف كده، واي كتاب نفسك تقرؤه، اكتب اسمه من قبل ما تقرؤه حتي ) 

الصفحة الشمال بقا، هتعمل جدول مكون من 50 مربع❗

وده هيشجعك خلال السنة انك تملي المربعات دي بعد ما تخلص كل كتاب تكتب اسمه 📕

⛔الصفحة الرابعة:

(صفحة الحاجات اللي نفسك تتعلمها، والمشاريع اللي نفسك تكسب منها، الافكار، الامنيات) 

اي حاجة بتخليك تعيش ف وهم. 

اتخلص من الوهم ده واكتبه في الصفحة دي! 

مثلا عمال تفكر دايما، انه يااااه نفسي اتعلم برمجة وانجليزي اوي.. 

اكتب في الصفحة دي 

- تعلم البرمجة 

- اتقان اللغة الانجليزية. 

او مثلا حابب تاخد كورس عن مجالك بس مش لاقي وقت 🤷‍♀️

اكتب اسمه 

نفسك تكون مليونير، وعندك شركات ومصانع، وابن اسمه عبد الوهاب البرعي. 

اكتب بردو نفسي تكون مليونير. 

الصفحة دي انا كأميرة اول مرة هحطها السنة دي ان شاء الله 

قرأت عنها في كتاب اول 20 ساعة. 

واكتشفت انها ليها أهميتين:-

١- بتخلصك من التفكير في اوهام وتخيلات بتستنزف طاقتك.

٢- بتحط ولو فرصة في المليون ان اوهامك دي تتحول لحقيقة! ♥

⛔الصفحة الخامسة:

التخطيط المالي 💰

وده بقا هتعمل فيه جدول لل ١٢ شهر 

علي اليمين (الدخل : سواء من شغلك او مصروفك) 

في النص (المصروفات) 

علي الشمال (الادخار) 

بص يا سيدي نفترض مثلا انك بتاخد في الشهر 1000 جنيه. 

ومتستعجبش، انت لو حسبت مصاريفك هتكون اكتر من كده حتي لو طالب. 

المهم انك لو بتاخد مصروف حاول تتفق مع اهلك تاخده كله في بداية الشهر. 

ولو بتشتغل وليك دخل خاص يبقي خير وبركة. 

علي اليمين 1000

في النص، هيكون كل شهر طبعا في حساب لمصروفاتك هنتكلم عنه بعدين في الخطط الشهرية ان شاء الله) 

هتحسب الشهر ده انا هصرف كام؟ 

وتراعي الاقتصاد في المصروفات. 

مثلا بلاش اكل ومشروبات كتير من برة. 

هات مج حراري ولانش بوكس وخد اكلك ومشروبك معاك. 

ومثلا بلاش مواصلات منظرة، لو بتركب اوبر مثلا.. بدله بمواصلات علي قدك. 

واحسب بقا مصاريفك كلها. 

وخصص 10℅ من دخلك للخانة التالتة وهي الادخار. 

لو 1000 كده هتدخر كام؟ 

100 جنيه. 

وتعالي علي ال 100 دي هتثتثمر منها 4℅ تطوير ذات. 

يعني 40 جنيه مثلا.. تجيب بقا كتاب مهم، او تكون 3 شهور استثمار وتاخد كورس مدفوع مش بيكون غالي خد بالك. 

او اشتراك چيم🏋

و 2℅ مكافأة 

مثلا تجيب شوكلت، او مج جديد، او لعبة روبيك مثلا، او ادوات مكتبية ملونة. 

و 4℅ ادخار. 

وحسب بقا دخلك قسم ميزانيتك. 

⛔الصفحة السادسة:

قائمة الكورسات 

وده نفس الجدول بتاع الكتب 

ع اليمين (كورسات اود الحصول عليها) 

علي الشمال 12 مربع تكتب اسم كل كورس بتاخده، ولو عايز اقل او اكتر براحتك. 

بس المعدل المتوسط كورس كل شهر. ♥

⛔الصفحة السابعة:

المتابعة الصحية. 

هتشوف وزنك، وهل عندك مشاكل صحية. 

مثلا بتنهج لما تطلع سلم، او دوخة، او للبنات بهتان البشرة وتساقط الشعر. 

(المهم ان اي مشاكل صحية بتكتبها) 

والحل في المشاكل دي، هيتعمل في صفحة العادات رقم 2

شهر يناير : الفطار بدري + اوميجا 3 بعد الفطار. 

شهر فبراير: تعلم رياضة نط الحبل، واشتري حبل ب ال 4℅ بتوع الاستثمار. 

شهر مارس : اكتساب عادة شرب 2 لتر كل يوم + منع السكر الابيض. 

وهكذا . 

⛔الصفحة الثامنة:

(الترفيه والمكافآت) 

هتعمل فيهم:

قسم المكافآت الكبيرة 

(ودي مثلا كل شهر لما تجيب اكتر من 80℅ من تقييمك الشخصي لالتزامك بالخطة) 

✅خروجات نفسك فيها 

✅حاجة عاوز تشتريها. 

✅سفرية مثلا 

قسم المكافئات الصغيرة 

(ودي بتكون علي الانجازات الصغيرة، ذاكرت ساعتين، قرأت وردك، عملت اي انجاز ف يومك بيخدم ال to do) 

✅مشروب مفضل 

✅فشار او تشتري حاجة من برا 

✅تتكلم مع صحابك او تقعد مع اهلك 

✅فيديو ترفيهي علي اليوتيوب (مش فيلم هاا، الافلام الكبيرة بحد اقصي كل اسبوع او شهر) عشان تعرف نفسك ان في مكافأة كبيرة لما تلتزم. 

⛔الصفحة التاسعة:

مهارات ومواهب. 

ودي بتكتب فيها كل مواهبك ومهاراتك الحالية (عشان تطورها) 

وتكتب مهارات جديدة مش عندك (عشان تكتسبها)

زي مثلا :

- الكتابة السريعة علي الكيبورد

- مهارة الالقاء

- لغة الجسد 

- التواصل الاجتماعي الفعال

-التسويق 

- التفويض

- ادارة وتنظيم الوقت. 

(والصفحة دي بتوصلك لاختيار الكتب والكورسات بعناية وحرفية ~ كل مهارة حطلها مصادر تعلمها ♥

⛔الصفحة العاشرة :

(علاقتي بربنا) 

ودي بتحط فيها اي سلسلة دينية ناوي تاخدها. 

جدول تقسيم حفظ القران. 

اي كتاب ديني نفسك تقرؤه (وبترحله بردو في قايمة الكتب صحصح معايا) 

العادات الدينية الجديدة /كل شهر عادة واحدة (ودي بترحلها علي صفحة رقم 2 بتاعت العادات فاكرها؟) ♥

وبكدة تكون جهزت اول 10 صفحات،للمتابعة السنوية 👩‍🎓

بقية البلانر بقا هيكون فيها تقسيمات مختلفة لكل شهر 👩‍💻

عيزاك تجهز ال 10 صفحات دول خلال الاسبوع ده بس 🏋

وان شاء الله يوم الجمعة الجاية ليلة راس السنة الساعة 4 ونص عصرا.. 

هناخد الجزء التاني من (بلانر 2022) 

وهنطبق علي شهر يناير ♥

واوعدك انك بعد كده هتعرف تعمل خطة كل شهر لوحدك. 

من خلال حاجة اسمها (المتابعة والتقييم علي تنفيذ التخطيط) 🧘‍♀️

مراحل التخطيط الاستراتيجي pdf
التخطيط الاستراتيجي doc
مفهوم التخطيط الاستراتيجي pdf
التخطيط الاستراتيجي ppt
أنواع التخطيط الاستراتيجي
مفهوم التخطيط الاستراتيجي في التعليم
فوائد التخطيط الاستراتيجي
ماهو التخطيط الاستراتيجي

اقوى مقالة عن موقع لينكد ان خلاصه تجربتى اكثر من 50000 متابع

سلااااام 🚶

سلسلة_التخطيط_مع_ميرا

author-img
نسعي بإذن الله لمساعدة الجميع وتوفير بيئة تعلم متميزة لاكتساب مهارات مايكروسوفت اوفيس بمنهج معتمد والمهارات السلوكية وتطوير الذات وايضا تعلم المهارات الحياتية الازمه لعقل سوى ومطور وايجاد الوظيفه المناسبه للجميع وتلبيه احتياجات الجميع باذن الله

تعليقات