مهارة الاستذكار ازاى تحفظ وافتكر اى حاجه بسرعه
◀️فن الأستذكار (mnemonics) 💡
أذاي تحفظ أي حاجة بسرعة؟ 👌🎯
أول حاجة لازم نعرفها يعني أيه فن الاستذكار mnemonic ❓
هي تقنيات بنستخدمها علشان تساعدنا على تذكر شئ ما و الأحتفاظ بالمعلومات وقت أطول ⏳
🔴تقنيات فن الأستذكار
1-القوافي
لاحظت لما رجعت من مكان ما إن فيه أغنية عمالة تتكرر في دماغك وأنت مسمعتهاش غير مره واحده وأنت راجع في المواصلات وعمال تقول لنفسك (مانا عمال بذاكر في المنهج ومش راضي يثبت أشمعنا الأغاني.. أنا أصلًا مش بتاع تعليم 💁🙆😂) طيب جرب الطريقة دي على المعلومات اللي عندك في المنهج جرب تعمل المعلومة على هيئة قصيدة فيها قافية أو أغنية هتثبت جدًا .
2- الاختصارات
هي كلمة تجمع حروفها جملة كاملة أو أكتر من جملة بمعنى إنك بدل ما تحفظ جملة لأ جمع أول حرف من كل كلمة فيها ذي مثلًا لو حابين نفتكر ألوان الطيف بترتيبها ممكن نعملها كدا Roy G. Biv و هنفهم إن R هي Red و ال o هي Orange وهكذا... أنا الطريقة دي كنت بستخدمها في الكيمياء في الثانوية لما حبيت أحفظ الألوان والألوان المتممة عملتها في كلمة GRBo. Vy (جربو ڤي) وكنت بعرف إن ال G يعني Green واللون المتمم R الRed وهكذا..
3ـ التقسيم
جرب تحفظ الرقم ده كدا 225368971483
وجرب تحفظه بالطريقة دي كدا
225--368--971--483 هتفرق جدًا لأن التقسيم بيساعدك إنك ترتب المعلومة في دماغك فتحفظها أما الرقم اللي فوق أنت مش عارف أوله من آخره فمش هتقدر تحفظه.
4- قصر الذاكرة 🏰
بص الموضوع ده حكاياته حكاية فأنت لو مهتم تعرف نشأة الموضوع ده أكتب في جوجل قصر الذاكرة وهيطلعلك الموضوع أما المهم في الموضوع إنك بتتخيل مكان 🛤 أنت حافظه وحافظ تفاصيله ذي مثلًا بيتك🏠 اللي أنت عايش فيه ولما تيجي تحفظ معلومة حطها في مكان في البيت أنا مثلًا لما كنت باجي أحفظ كلمات أنجليزي كنت بقول هحط الكلمة دي في درج المكتب والكلمة دي في التلاجة😂💁 الكلام ده في مخك طبعًا كتخيل 💭 ولما تيجي تفتكر المعلومة هتفتكر المكان والمحفوظ فيه.
5-الربط
ربط المعلومة بحاجة أنت عارفها أو حاجة مميزه الطريقة دي بنستخدمها كتير وأحنا مش عارفين🚶 هفكرك في ناس كتير بتستخدمها في تسجيل الأرقام في تليفوناتها💁 تلاقي الواحد مسجل رقم حد وكاتب جنبه اللي كان معايا في كذا أو يكتب الوظيفة بتاعته جمبه 😂😂(واجب عملي: أبقى شوف أصحابك مسجلينك أيه على موبيلاتهم😂🤸) المهم وظف الفكره دي مع المعلومات اللي حابب تحفظها أربط المعلومة بحاجة مضحكة، بقصة مميزة وكدا.
◀️على فكره أنتَ كمان ممكن تبتكر طريقة فعالة تقدر تحفظ بيها، يعني الموضوع مش مقتصر على الحاجات اللي ذكرتها فوق بس.
***********
🔷ال mind maps الخرائط الذهنية 📝
طريقة فعالة وكلنا عارفينها وناس كتير بتستخدمها ومبقتش تستخدم بس لتبسيط المعلومات وحفظها لأ كمان بقت بتستخدم في التخطيط، ناس كتير بتستخدمها حاول تستغل الطريقة دي في تبسيط المعلومة، حتى لو أنت مش بتعرف تعمل خرائط ذهنية بقى فيه برامج مخصصة لكدا.
. *************
🔴التكرار المتباعد spaced repetition
للأسف كتير مننا بيقعد يكرر في المعلومة ساعة واتنين وتلاته ويمكن يقعد يذاكر الدرس أو المحاضرة يوم كامل ولما يجي يحاول يسترجع اللي ذاكره يلاقي Zero حفظ... ليه ❓ لأنه عمال بيحشي مخه بمعلومات كتير في نفس الوقت ولو جرب التكرار المتباعد هيلاقي فرق كبير في الحفظ يعني مثلًا ممكن أذاكر الحاجة مره الصبح وأجي بالليل أبص عليها تاني، وتاني يوم نفس الموضوع هتلاقي المعلومة ثبتت عندك، أنا مجربه الموضوع ده حفظت قصيده صعبه بيها 📄حبيت صعوبة القصيدة فقررت أحفظها (القصيدة اسمها صوت صفير البلبل) كل اللي عملته أني قرأتها كل يوم لغاية ملقيت نفسي حفظتها في وقت قليل مع إن كلمات القصيده بتدخل في بعضها بس حفظتها جدًا ومنستهاش.. جرب الطريقة دي حلوة جدًا.
*************
عارفه إني طولت عليكم بس فيه حاجه عايزه أقولهالكم ساعات كتير بنقعد نقارن نفسنا بغيرنا فلان مخه أحسن من مخي، و الناس كلها بتحفظ بسرعة ومخها ذي الفل وأنا لأ...... بس هقولك على حاجة بطل تقلل من نفسك، أنت حاجة كدا مفيش منك اتنين آه والله ذمبقولك كدا 🤸 بس في ناس بتفهم وتذاكر بأي طريقة وفي ناس مخها رايق محتاجه طرق رايقه 👌جرب الطرق دي وبإذن الله هتبقا تمام✌ ♥🎯
سلام بقا🌷♥
قواعد اللغه الانجليزية كاملة للمبتدئين-المستوى الاول
#دعاء القناوي
