أخر الاخبار

العلقة اللي خدتها واللي عمري ما نسيتها


العلقة اللي خدتها واللي عمري ما نسيتها

عمليات البحث ذات الصلة
جدول تغذية الطفل النحيف
جدول غذائي للاطفال عمر 4 سنوات
جدول أكل صحي للاطفال
طرق تغذية الطفل الضعيف
النظام الغذائي للأطفال من 4 سنوات حتى 18 سنة
برنامج غذائي للاطفال 6 سنوات
نظام غذائي صحي للأطفال ثلاث سنوات
جدول غذائي للاطفال 3 سنوات

قهوتك وقلمك وركز معايا مش هتندم 

 في الفترة ديه من حياتي كطفل كنا بنتربى أنا وأقراني اننا مناخدش حاجة من حد علشان “عيب” … علشان “بابا قال لا”

وانا طفل ، كنت يمكن 7 سنين – أقل أو أزيد- ، روحت عند جيراننا وعمو اداني شيكولاتة وانا ماشي ، فانا كطفل مُحب للشيكولاتة خدتها وروحت البيت ووالدي عرف ، فخدت علقة مفادها “عيب تاخد حاجة من حد”

ومن ساعتها مبقتش احب اخد الحاجة من حد لإنها عيب ..

بس من جوايا انا نفسي اخدها لإني بحب الشيكولاتة …

ومش فاهم “هو فين العيب؟!”

كبرت واتجوزت وخلفت ومحاولتش اني أوجه أحمد إنه مياخدش حاجة تتقدمله ، ومقولتلوش ياخد ، بس حبيت أديله فرصة الاختيار بنفسه وإدراك اللي انا يمكن مقدرتش أفهمه في صغري ..

كل اللي عملته اني جبتله شيكولاتة ، وكل شوية بيضة كيندر ، ولو فتح التلاجة هيلاقي شيكولاتة زي ما هو عايز ، طبعا تحت المراقبة والموافقة ، ممكن ياخد واحدة على حسب التقدير السليم والمناسب لسنه ولعوامل تانية

بس اللي عمله كانت حاجة خلتني مبسوط جدا .. وده اللي جاي احكيهولكم

شوفته قدامي ، طفل عنده 4 سنين ، شخص ما بيعزم عليه بشيكولاتة .. والمفجأة إن أحمد مخدهاش ..

أحمد ببساطة مخدش الشيكولاتة ، من غير ما اقوله “عيب” ، “متاخدش حاجة من حد” ومن غير ما اوجهه للصح والغلط !

أحمد قدر إنه يفهمني معنى حديث سيدنا محمد صلى الله عليه وسلم لما قال “الحلال بين والحرام بين” ..

طفل حرفيا وعيه أد سنه ، قدر إنه مياخدش الشيكولاتة من غير ما اقوله عيب أو حرام أو غلط أو لأ

ولو انت أب هتفهم إحساس السعادة اللي ممكن تحس بيها لما تلاقي ابنك أو بنتك اتصرفوا بشكل صحيح بشكل تلقائي وفطري، لا خوف من عقاب ولا حتى بعد توجيه ..

 

بس عارفين هو اتصرف كده ليه ؟

لإنه مكتفي..

لإن التلاجة مليانة شيكولاتة ..

ولما بنكون راضيين ومكتفيين ، مبنحتاجش توجيهات أو تعليمات أو علقة سخنة ..

وانا صغير مكنش عندنا ثقافة الشيكولاتة .. لكن جيل أحمد مختلف ..

هي أسهل حاجة ممكن يحصل عليها .. ولإنه مكتفي .. قدر لوحده .. من غير تدخل إنه ببساطة يقول “لأ”

الأب اللي بيدي لبنته حب واهتمام ، بيربيها تقول “لأ” لأي حد بيحاول يضحك عليها عاطفيا لإنها مكتفية

الأم اللي بتزرع في عقل ابنها انه قوي .. هيقول “لأ” لما حد يحاول انه يستضعفه .. من غير توجيه

مشكلة الناس انها عايزة تقول “لأ” .. علشان عيب .. أو “لأ” للرغبات ، أو “لأ” للفرص الغلط والسلوكيات .. من غير مايكون عندها بديل حقيقي او مورد يحققلها الاكتفاء الذاتي ..

انك توصل للتصرف السليم من غير توجيه .. ده بيحتاج منك انك تكون مكتفي حب و مادة وثقة ، واهتمام وسلام نفسي ..

ساعتها مش هتحتاج ألف كتاب علشان يوجهوك للتصرف السليم ..

التصرف السليم والاختيارات السليمة والقرارات السليمة هتحصل كنتيجة ثانوية من غير أي توجيه من العالم الخارجي ..

نسبة كبيرة من الناس اللي بتيجي الجلسات بتختار الاختيارات اللي عندهم نقص فيها

او انعدام موارد وبيندموا عليها بعد كده .. ناس معندهمش شيكولاتة ..


أنهي احسن بالنسبة لك ؟

شخص مكتوم ومقيد بقيود ومبيعملش غلطة ؟ ولا

شخص حر .. وبيغلط وبيتوب ؟

للأسف الناس اتبرمجت على القيد واهمية القواعد واهمية الهوية اللي الناس مستعدة انها تدافع عنها حتى لو بالإرهاب والشر . ولو على المبرر هيجيبلك مليون مبرر ..


لما محمد صلاح قال “انا مش عايز اشرب خمرة لإن نفسي مبتروحلهاش” فانا مش قادر ادرك سبب ضيق الناس من إنه مقالش انها “حرام” أو “عيب” ..

ارتقوا بوعيكم تجاه ربكم .. الله عز وجل اصطفى سيدنا محمد صلى الله عليه وسلم وجعله نبي ، مش لإنه بيعمل الحلال وبيبعد عن الحرام .. لإن اللي هو كان بيعمله بشكل تلقائي كان حلال من غير توجيهات أو آيات منزلة .. ولما وصفه قال “وإنك لعلى خلق عظيم”

امسك عصاية واضرب بنتك وخليها تتحجب بالعافية … افرح لما تلاقيها واخدة بونيه في عنيها ولابسة طرحة … وعيش طول عمرك قلقان وشاكك فيها لإنها ملبستوش بمزاجها

اضرب مراتك علشان متكلمش حد تاني غيرك .. ومش هتكلم حد غيرك .. بس انت الوحيد اللي هيفضل طول عمره مش متأكد منها لإنك عارف انها مختارتش ده بنفسها ..

الأدق هو انك توصل بنفسك ، لإنك مكتفي .. لانك مليان .. لإنك شبعان .. ساعتها هتختار صح .. واختيارك هتلتزم بيه مش لانك مجبر عليه .. بس لإنك ببساطة وصلتله بعد شبع .. مش من منطلق جوع

كلنا بنشوف المسلمين الجدد ، كلنا عارفين انهم بيدخلوا الدين وبيكونوا اكثر التزاما من المسلمين “بالبطاقة” عارفين ليه ؟ لإنه جرب يا صديقي . لإنه عرف .. ولإنه وصل قبل حتى ما ينطق الشهادة .

اللي عمله محمد صلاح ، أفضل مليون مرة من إنه يقول “لا والله اصل انا مش بشرب لإنها حرام ” ..

ده وصل لملايين من الشباب الصغير اللي بيتابعوه إنك “تقدر تختار والأفضل بيختار لنفسه الأفضل” فلما تيجي تعرف بعد كده انها حرام “هيزيد ايمانك بصحة دينك” .. ماهو اكيد محمد صلاح عارف انها حرام ومش هيشرح يعني في برنامج بيبث في بلد مسلم .. بس رده كان أفضل من كل الردود المحفوظة اللي اتعلمناها ..

بس كدا يسيدي بس استني خد هنا رايح فين ادخل ع قسم التطوير عندنا هتلاقي كل الللي نفسك فيه  علشان تطور من نفسك ومتنساش بقا تبعت اللينك لاصحابك علشان يستفيدوا هما كمان ولا انت اناني ؟

ولو عاوز تتعلم الماني علشان نقولك يا الماني اضغط هنا https://bit.ly/3gnNTum

عمليات البحث ذات الصلة

جدول تغذية الطفل النحيف

جدول غذائي للاطفال عمر 4 سنوات

جدول أكل صحي للاطفال

طرق تغذية الطفل الضعيف

النظام الغذائي للأطفال من 4 سنوات حتى 18 سنة

برنامج غذائي للاطفال 6 سنوات

نظام غذائي صحي للأطفال ثلاث سنوات

جدول غذائي للاطفال 3 سنوات

تعليقات



حجم الخط
+
16
-
تباعد السطور
+
2
-