15 فكرة لجعل حياتك اكثر سعادة
تعلم تلك الأفكار و المهارات!
1- مهم يكون عندك مهارات فنية فى مجال شغلك، تبقى عارف تروح فين علشان تجيب إيه، دى بتيجى من الدراسة والتدريب والقراءة المستمرة وتحديث المعلومات بشكل دائم.. المعلومات التي حصلت عليها بكليتك مهمة لكن في الغالب الواقع بيشتغل بطرق أخرى ووسائل أحدث فماتعتمدش على اللي درسته فقط.
.
2- الدراسات العليا بعد التخرج على طول مش مفيدة ومش هتفرق معاك في حاجة أول 5 سنوات، ركز تتعلم الشغل العملي اللي الواقع محتاجه علشان تشتغل في مكان جيد..بعد ماتستقر في شغل وتعمل لنفسك مهنة ادخل في الدراسات العليا في المجال اللى تخصصت فيه.
.
3- اشتغل في المكان اللي هيديك فرصة تتعلم..ده أهم من المرتب في بداية حياتك.
.
4- ماتستعجلش تبقى مدير، وماتدورش على المسمى الوظيفي، دور على حاجة تتعلم فيها حتى لو هتبدأ من الصفر، التعليم العملي الصح في بداية حياتك هيوفر عليك سنوات كثيرة فيما بعد..اتأسس صح.
..
5- مهارة اللغة؛ تعرف تتكلم اللغة اللى محتاجها فى شغلك، لو بنتكلم عن مصر والدول اللى حوالينا، فلازم يكون عندك الحد الأدنى من اللغة الإنجليزية اللى تخليك تعرف تتعامل وتتواصل وتكتب إيميل وترد على تليفون، دى بتيجى من الممارسة أكثر منها كورسات.
.
6- مهارة التعامل مع الكومبيوتر، تعرف تستخدم ورد، اكسيل، بور بوينت على الأقل، وتعرف تتعامل مع البرامج اللى محتاجها شغلك.
.
7- تفهم مبادىء بعض المهارات اللى ممكن ماتكونش فى صميم شغلك بس هتتعرض ليها زى مبادئ التسويق، مبادىء خدمة العملاء، مهارات التفاوض، مبادىء التفكير النقدى، مبادىء إدارة الموارد البشرية، مبادىء عمل بدجت..الخ
دى ممكن تكتسبها بالقراءة أو فيديوهات بس طالما مش تخصصك بس هتفيدك كثيراً فى أى مجال هتشتغل فيه.
.
8 - تتعلم مهارات إدارة الوقت وإزاى تدي أولويات حسب المطلوب منك، وتقسم مايعرض عليك إلى عاجل وضرورى أو ضرورى وغير عاجل أو غير ضرورى وعاجل أو غير ضرورى وغير عاجل..الخ وبناء عليه تقدر تستغل وقتك حسب رؤيتك بشكل صحيح!
.
9- يكون عندك مهارة العرض، تعرف تتكلم وتعرض وتناقش وتقنع، أكثر حاجة تعلمك الموضوع ده إن تشتغل مع حد عنده المهارات دى، هتتعدى منه !
.
10- تتعلم إن مافيش حاجة إسمها فهلوة طول الوقت، ممكن تنفع مرة أو اثنين، إنما طول الوقت مستحيل، فدعم نفسك بعلم ومهارات تخليك عندك ثقة فى نفسك وقدراتك!
.
11- مافيش حاجة بتيجي بسرعة، كل حاجة محتاجة وقت فلازم تتعلم تصبر، تتعلم تدير الضغوط ، تتأكد إنك ماشى فى الإتجاه الصحيح.
.
12 - الكذاب والمنافق والعصفورة شخص مش محترف، هو شخص ضعيف، مريض، فمتبقاش كده!
.
13- مهم تفهم إن كل تعب هتتعبه هتاخد مقابل له.. إن الله لا يضيع أجر من أحسن عملا.
.
14- ماتقارنش نفسك مع حد.. إنت مش داخل سباق مع حد..كل واحد له رزق هياخده..اسعى إنك تطور نفسك فقط.
.
15- تتعلم وتوقن أن كل شيئاً يحدث إنما هو بتوفيق الله سبحانه، وفقط دورنا هو أن نأخذ بالأسباب التى يسرها وأن النتائج أمرها بيده، وما نؤتى إنما هو من فضله وحده.