ماذا تفعل عندما تكره عملك إذا لم ترتاح في عملك نصائح للموظفين
.png)
بيئة العمل المثالية pdf
ماذا تفعل عندما تكره عملك
مقابلات العمل الناجحة
كيف تبدع في عملك
أول أسبوع في العمل
أسئلة مقابلة عمل واجوبتها
إذا لم ترتاح في عملك
نصائح للموظفين
1 - وارد جدا تشتغل بواسطة، وارد جدا تشتغل بالصدفة، ممكن تلاقي Job .. بس صعب أو مستحيل تبني Career بالصدفة أو الواسطة، ممكن تحصل، نادراً أوي، فلو ناوي تنتظر السمكة اللي فيها الخاتم الدهب، باعتبار إنك شايف نفسك إنسان كويس و إن العدل إنك حظك يكون حلو، فنصيحة بلاش .. الفرص بيتم صناعتها عن طريق تهيئة الظروف لحدوث تغيير، و الخطوة الأولي لحصول ده: إنك تاخد الخطوة الأولي. يعني الخطوة الأولي هي الخطوة الأولي.
2- حط في دماغك إن الموضوع عمره ما كان ولا هيبقي سهل، ولا هو صعب، هو محتاج مجهود منظم و مستمر. هيء نفسك إنك تقدم تنازلات، و في أوقات معينة هتحس بشيء من المرمطة، و إنك بتعمل حاجات عكس إرادتك، و بتعمل حاجات مش مريحة، و بتعمل حاجات انت خايف و قلقان منها.. كل ده طبيعي، ده شغل، يعني قائم علي مبدئين: التضحية، و التعويض. دي فكرة الشغل .. بتضحي بوقت كان ممكن تنام فيه أو تتفرج فيه علي التلفزيون .. في مقابل التعويض اللي هو المال.
3- الوظايف مابقتش زي زمان، معادتش محصورة في دكتور و مهندس و ظابط و مدرس، و ده يخلينا نغير طريقة تفكيرنا لنفسنا، و تجاه عيالنا و هم لسة في ثانوي فيما يخص طموحاتهم، في وظايف جديدة ظهرت لغاية التمانينات و التسعينات كانت مش موجودة أو نادرة، زي خدمة العملاء و الـ HR و إدارة المشروعات، و بقي في كل تخصص من دول تخصصات جديدة، و حتي الوظايف المعروفة التقليدية زي الطبيب بقي يدخل عليها تعديلات في مفهومها، فبقي الطبيب بجانب دوره الطبي لازم بيقدم Patient Counseling (تقديم استشارات طبية و دعم نفسي للمريض)، و شئون العاملين اللي كانت قاصرة علي المرتبات و التعيينات و الترقيات اتغيرت و بقي HR و اتضاف إليها مفهوم الTalent Management و الHuman Capital، و المدرس اتضاف لدوره تعديلات و بقي Coach و Trainer بيقدم دعم و تدريب مش مجرد تلقين، سوق العمل بيتحرك حواليك بسرعة، احتياجات و مطالب جديدة بتظهر، فحلول بتظهر للاحتياجات دي، فوظايف جديدة بتظهر للإشخاص اللي هيقوموا بتقديم الخدمات دي. إحساس إنك زي الأطرش في الزفة إحساس وحش، و أنا جربته، بالتالي لا يكفي إنك تدور علي وظيفة أحلامك، لازم تدعبس حواليها في المجالات المرتبطة بيها.
4 - بناء علي نقطة رقم (3)، ايه المانع إني أهيأ نفسي لكدة؟ و لما يبقي عندي أولاد أبقي أكلمهم ببساطة عن كل الوظايف دي؟ فيها إيه لما يبقي طموحي أتفوق في الـ HR لغاية ما أبقي في الإدارة العليا لشركة و بعدين أمسك شركة؟ فيها إيه لما أترقي في مجال الـ Sales و الــ Marketing أو خدمة العملاء لغاية ما أبقي خبير محترم و أتولي إدارة شركة أو أكتر؟ هي دي كدة مش قمة؟ هي لازم كليات القمة طب و صيدلة و هندسة؟
5 - كنت باتكلم مع صديق ليا من فترة عن معاناة إنه يشرح لأقاربه و جيرانه كبار السن - اللي بنقدّرهم و نحترمهم - إنه بيشتغل Sales، الفكرة مش في إنك تترجم الكلمة لـ (مبيعات)، الفكرة إنك تشرحله إن (البيع) بقي في حد ذاته مجال، لأن كان سابقا فلان بيبيع قماش، فالمجال هو القماش .. فلان بيبيع قطع غيار سيارات، فالمجال هو قطع الغيار .. لكن إن مجالك يبقي (البيع) نفسه و إنك تتدرب علي أساليبه و مهاراته و تحضرله كورسات و يبقي في سُلَّم وظيفي كامل للبيع .. فدي جديدة علي آبائنا و أجدادنا و أهلنا بالذات لو لم يتخرجوا من الجامعة .. فمعلش .. خدهالهم واحدة واحدة بالأمثلة عشان يطمنوا عليك إنك مش شغال نصاب ولا مطاهر ولا حلاق صحة.
6- المجالات اللي اتكلمت عنها فوق دي، زي الـ HR و الـ Customer Service و الـ Marketing، و الـ Sales و الـ Training .. و غيرهم ..أحلي حاجة فيهم إنهم قائمين علي الـ Skills، المهارات، مش علي الشهادة الجامعية .. ممكن لو أنا مهندس أبقي أحسن Trainer أو Marketer (مُسَوِّق) في مصر -- لو اتدربت علي المهارات المطلوبة ليها. و ركّز أوي علي كلمة (لو).
7- نجاحك في أي مجال يتطلب منك إتقان لـ 4 أنواع من الـ Skills: اللغة (و بالذات الإنجليزي)، ( الـ Business Skills) و أساسيات الـ Computer Skills، و المهارات التخصصية الفنية بتاعتك Technical Skills أيا كانت، سواء كانت قانون أو طب أو صيدلة أو محاسبة.
8 - ماتدرسش لغات بشكل عشوائي. اللغة Skill، و تعلمها نوع من الاستثمار، و في الاقتصاد مبدأ الـ ROI اللي هو Return on Investment ( العائد علي الاستثمار) .. بيقولك: حدد الأول: هاتعلم اللغة الفلانية ليه؟ في لغات قيمتها الاقتصادية ضئيلة نسبيا زي الإيطالي مثلا، مفيش غير إيطاليا بتتكلمه، بس لو مطلوب منك سفر لإيطاليا و لازم تتقنه يبقي ماشي .. و كذلك التركي و الروسي، و العبري إتقانه ممنوع لدواعي أمنية، فماتهدرش وقتك و فلوسك اللي ممكن تستثمرهم في مشاريع و حاجات تعود عليك بفوائد عالية في تعلم لغات لا قيمة لها.. إلا لو انت بالفعل مرتاح ماديا و عندك وقت طويل فاضي و بتتعلم بغرض المتعة.
9 - عمرك ما هتعيش ما يكفي من العمر إنك تتعلم كل حاجة في مجالك، ولو غامرت و قررت تتعلم كل حاجة لوحدك هتهدر وقت و فلوس كتير. استعين بالخبراء في مجالك. حدد معاد مع أفضل حد تعرفه في المجال ده و اتكلم معاه، اسأله أسئلة محددة و واضحة عشان تطلع منه بإجابات واضحة. الناس دول أغلبهم وقتهم قصير و بخلا في المعلومة، فلازم تكون صبور معاهم، و في فرق بين (صبور) و (زنان) .. و معلش .. مع احترامي، فيهم ناس في منتهى الألاطة، و فيهم ناس محترمين لكن مشغولين جدا، فلما تزن تزن علي دماغ حد و تبعتله علامات استفهام (؟؟) كل شوية في الرسايل - و الحركة دي هي المادة الخام للجليطة و انتهاك الخصوصية - فوارد جدا يعملك بلوك .. أنا كعمرو راجل علي باب الله .. مش زي الفطاحل دول .. بس فعلا بحتاج أوقات للتركيز و مش ببقي مبسوط لما حد يطلبني كل 5 دقايق يلح عليا في طلب. خدهم واحدة واحدة ع الهادي كدة .. بحيث تطلع منهم بمعلومات كويسة.
10 - العلاقات ممكن تساعدك تشتغل،
بس العلاقات نوعين: الـ Nepotism (المحسوبية) اللي بنسميها الكوسة، و دي غير أخلاقية و حرام، لأنك بتتصل بفلان اللي بيشتغل في الشركة أو ماسك منصب في البلد بيخليك تتقبل سواء كفء أو لأ و بدون منافسة مع غيرك.
لكن في نوع تاني من العلاقات إسمه ( Networking)، و ده إنك يكون ليك شبكة اجتماعية من العلاقات و المعارف مع ناس ناجحين تساعدك إنك تاخد فرصة في المنافسة، ولو انت كفء تتقبل ولو مش كفء هياخدوا غيرك. إحرص علي إنك تبني شبكة من العلاقات مع الناس المهمين في عدة مجالات.
11- آسف للكلام الصادم ده .. بس و الله الـ HR في الشركات مش هيستجيبوا لتوسلاتك اللي بتكتبها في الإيميل إنك محتاج الوظيفة. مش هتصعب علي حد، ماحدش مهتم بمعاناتك، ماحدش قلقان علي مصاريفك و تكاليفك، ماحدش فارق معاه إنك عايز ترتبط، ماحدش مهتم بيك كإنسان .. لو عندك Skills هتشتغل ولو بعد فترة، ولو الـ Networking Skills بتاعتك كويسة هتعرف تقلل الفترة دي أوي بإذن الله. في حالات نادرة ممكن حد يحس بيك و يساعدك (إنسانيا) بإنه يرشحك لوظيفة .. بس أرجوك بلاش دي تبقي Way of Life بالنسبالك .. اثبت نفسك بنفسك، و خلي شغلك هو اللي يتكلم عنك. و أنا هنا مش باكلمك عن وجهة نظري، أنا باقولك الناس اللي بتتعامل معاهم بيفكروا إزاي.
12 - في عندنا حاجة اسمها KSA، ( مش اختصار للمملكة العربية السعودية)، لأ دي اختصار ل3 حاجات، هم الــ Knowledge (المعرفة)، و الSkillsـ (المهارات اللي هي التطبيق العملي للمعرفة)، و الـ Attitude (اللي هي طريقتك. طريقتك في التفكير و الكلام و العمل). خلي نفسك مستواك Excellent في الـ 3 حاجات دول و هتشتغل بإذن الله.
13 - ماتقولليش ماهو البلد مليانة حملة ماجستير و دكتوراه مش شغالين، لأن الماجستير و الدكتوراه – برغم أهميتهم و عظمتهم – هم مجرد Knowledge في ورق، و ليس بالضرورة الحاصل علي شهادات يكون عنده مهارات.
14 - بس خلي بالك مفيش صاحب شركة أو مصنع هيعين كل الموظفين و المهندسين بالكوسة، لأنه فاهم كويس إن اللي شغال بالكوسة إكراما لفلان قريبة و فلان بيه معرفته و فلان صاحبه .. عارف كويس إن دول مستواهم بيبقي في الكنافة، ولا فاهمين حاجة، فبالتالي مش مستعد يخلي المصنع كله مهندسين بهايم يولعوله في المصنع، أو محاسبين جهلة يضيعوله حسابات الشركة .. فبيبقي عنده نسبة معينة من الكوسة لا يتعداها .. مش بس لأسباب أخلاقية .. لكن حرصا علي سلامة الشغل. فبالتالي الكوسة موجودة لكن في فرص كتير موجودة.
15 - الكوسة ممكن تشغلك، لكن مش هتنجحك. هي ممكن تلمّعك شوية، تخلي مديرينك يرضوا عنك، أو يتظاهروا بده عشان خاطر فلان و علان .. لكن العميل – اللي هو أصل البيزنس – هيرضي عنك إزاي؟ و ده عن تجربة شخصية معايا.
16 – عمنا كلنا (براين تريسي) – رجل الأعمال و المحاضر الأمريكي
- بيقول: الوظايف اللي بتشوفها في الجرايد و الفيسبوك و موقع linkedin و غيرهم، كل دي لا تساوي أكتر من 20 % من الوظايف الخالية الحقيقية. لأن 80% من الوظايف الخالية لا يتم الإعلان عنها، و ماتعرفش توصللها إلا بالـ Networking. و آه .. نسبة 80% دي معقولة جدا.
17 – عارف ليه لا يتم الإعلان عن كل الوظايف المتاحة؟ لأسباب كتير، من أهمها – لو افترضنا إن الإدارة محترمة – فسبب رئيسي هو إن موظف الـ HR بيصحي الصبح علي 300 إيميل تقديم في 50 Position في الشركة .. ومطلوب منه يختار مثلا 5 محاسبين من بين 200 واحد باعتين الـ CV ، ده غير الناس اللي بتبعت عشوائيا .. يلاقي الشركة طالبة محاسبين وهو خريج حقوق فيبعت .. غلاسة كدة .. الناس دول بينفخوا الموظف و بيستهلكوه، و بيساهموا في ضياع فرص عن غيرهم يستحق. فتيجي الشركة مثلا تكلم واحد Career Adviser غلبان زي حالاتي .. يا عم عمرو .. ابعتلنا احسن 30 محاسب من تلامذتك، هنختار منهم. فأبعتلهم أنا يختاروا منهم .. و أقولهم Notes علي كل واحد، لكن مليش سلطة تعيين حد فيهم .. أنا بارشح الناس اللي شايفهم كفء. و ده لا عيب ولا حرام، بل أرجو الله إنه يكون في ميزان حسناتي.
18 - أحسن حاجة ممكن تعملها لو عندك Interview إنك تستخدم عنصر اسمه الـ Dazzling، اللي هو بالعربي (الإبهار)، إنك تبهر المدير اللي قدامك بمظهرك، بمعلوماتك عن الوظيفة، باستعدادك الجيد، باجاباتك المنظمة، بثقتك في نفسك، بمعلوماتك عن الشركة، بمعلوماتك عنه لو أمكن (و ده مش مستحيل بس محتاج شوية بحث)، بمعلوماتك عن المجال، بوصولك في معادك، باستعدادك بكل المستندات المطلوبة، بقدرتك علي الرد علي الأسئلة الصعبة، بمستواك في اللغة الإنجليزية، بلباقتك في الحديث و استماعك و ذوقك و حسك في الدعابة (بحدود). إبهرهم. ابهرهم بدون أساليب البكش المبتذلة بتاعة التنمية المهلبية البشرية.
19 – في أسباب كتير تخلي الشركة ماتتصلش بيك بعد الإنترفيو، إن شاء الله هاعمل فيديو عنها .. فمش معني إنك تروح انترفيو و تترفض إنك ضعيف، لأ ممكن تكون انت ممتاز، بس لقوا شخص ممتاز جدا، فبالتالي ماتقهرش نفسك لو ماحدش اتصل بيك بعدها، في أسباب متعلقة بالميزانية، و أسباب متعلقة بسوء التنظيم و تجميع الداتا من الشركة، و أسباب متعلقة بشركات الـ Outsource اللي عملتلك الانترفيو.
20 - زي ما قلنا فوق، كتير من مجالات العمل دلوقتي معتمدة علي الـ Skills أكتر من اعتمادها علي الشهادات، يعني لو لسة طالب في إمكانك تخلي الـSkills بتاعتك ممتازة و هتشتغل في شركة .. أيوة هتشتغل في شركة بدل ما تقف في محل، مع احترامي طبعا لكل الوظايف.
21 – ماتزعلش/ ماتزعليش مني، احنا اتفقنا علي الصراحة .. بتجيلي أسئلة و طلبات في الرسايل، زي مثلا .. عايز أشتغل ..طب بتتكلم إنجليزي؟ معاك كورسات؟ اشتغلت في حاجة قبل كدة؟ لأ. بتعرف في برامج الأوفيس؟ لأ. طيب .. مفيش مشكلة ..يبقي نشتغل في وظيفة مش طموحة أوي، و نشتغل علي نفسنا، واحدة واحدة، و الوحشة تجيب الحلوة. يعني ماتتكسفش إنك تبقي طالب جامعي و شغال في محل أو عيادة أو في أوبر أو في مخبز .. ماهو حضرتك الشغل محتاج متطلبات. خلاص ماتشتغلش دلوقتي .. اشتغل لما تاخدلك كام كورس و انجليزي و بيزنس و كمبيوتر .. "لأ مش معايا فلوس" .. هقوله: مفيش مشكلة .. خدها علي النت مجانا .. يقوللي: ماهي بالانجليزي و انا ضعيف في الانجليزي. أقوله: طب إبدأ بالانجليزي و اتعلمه .. يقوللي: ماهو انا بابدأ شوية و بزهق .. و بصراحة أنا أصلا شغال بباقة و معنديش واي فاي. أٌقوله: طب اشتغل شغلانة بسيطة و دخّل نت سريع و خد كورسات و انبسط. يقوللي: طب ماتشوفلي انت شغلانة عند حد تبعك. و الله يا جماعة العينة دي كتيرة جدا جدا .. طبعا الواحد حاسس بيهم علي المستوي الإنساني كضحايا للتعليم الضايع ده ..لكن اللي مصمم يفضل بروطة كدة هاعمله ايه؟
22 - إمسك ورقة و قلم ..و اسأل نفسك:
اليه الـ KSA اللي عندي؟ مستوايا فيهم ايه؟ طب ايه الوظيفة اللي انا عايزها؟ طب ايه المطلوب ليها؟ طب مين اشتغلها و نجح فيها قبل كده؟ طب إيه الأخطاء اللي ممكن أتفاداها؟
23 - لو معاك شوية فلوس مش مزنوق فيهم، دور علي وظيفة، و حاول تعمل ليك أي مصدر دخل آخر بيهم. لازم تنوع في مصادر دخلك، و نصيحتي ليك: ماتبدأش تدخل بيزنس إلا و انت فاهم كل حاجة. إسأل المتخصصين .. ماتسألش حد غبي أو جاهل، اسأل اللي يكلمك عن خبرة عملية و دراسة، مش خبرة بس، ولا دراسة بس.
24 – عشان تفتح عيادة لازم تدرس طب، و عشان تبقي مهندس لازم تدرس هندسة، و عشان تفتح بيزنس خاص بيك .. لازم تدرس بيزنس. أيوة أيوة عارف إنك شاطر و مذاكر و هتقوللي علي ناس بدأت بدون دراسة .. زي (محمود العربي) و (أحمد عز) و غيرهم و غيرهم .. بس دلوقتي الـ Market اتغير .. و العميل اتغير .. و أنا اتغيرت، و حضرتك اتغيرت .. الدنيا مش واقفة علي نفس الحال من الستينيات. 😊
25 - أي كورس تثق في المحاضر اللي بيديه و تمنه معقول و انت محتاجه بلاش تفوته، بس عشان خاطري، اقرأ كويس عن المحاضر اللي هيشرحلك، و اتناقش معاه كويس جدا.
26 - عدوك الأول مش ظلم الحكومة ولا الكوسة في الشركات، عدوك الأول مش مناهج التعليم الخيبانة، عدوك الأول مش الناس اللي بيحسدوك .. عدوك الأول هوالكسل، اللي هو الـ Comfort Zone، اللي هو الـ .. آه أيوة ..هو .. لو عرفت تخلص منه هتقطع شوط كبير في حياتك.
بيئة العمل المثالية pdf
ماذا تفعل عندما تكره عملك
مقابلات العمل الناجحة
كيف تبدع في عملك
أول أسبوع في العمل
أسئلة مقابلة عمل واجوبتها
إذا لم ترتاح في عملك
27 - الوقت هيعدي كدة كدة، سواء أخدت كورسات و طورت من نفسك و قريت في مجالك و بقيت ممتاز، أو انتخت. كدة كدة هيعدي، بس في ايدك تخليه زي الفلوس في البنك، بيعدي و انت بتزيد، أو يعدي و انت بتقل (لأن سنك بيكبر) .. و اللي هتكسل تعمله دلوقتي عشان لسة فاضل عليه سنة و يخلص .. هتعدي السنة بدونه و هتقول ياااااااه لو كنت بدأت من سنة كان زماني خلصت. إبدأ دلوقتي.
28 – صديق ليا فاتح كافيه. أعتقد إنه بيقرأ البوست ده دلوقتي. مرة قاللي: "عارف يا مستر؟ و الله .. أي حركة باعملها و أتعب نفسي بنية ربنا يبعتلي رزق .. فعلا ربنا بيكرمني ..ساعات يا مستر الكافيه يبقي فاضي و بينش ..أقف كدة أمسك الفوطة و أمسح الترابيزات تاني و أعمل أي حركة، ألاقي ربك بعت زباين." الكلام اللي صديقي قاله ده خلاصته: الحركة بركة. أي حاجة تعرف إنها صح إعملها و قول: توكلنا عليك يا رب. اعمل أقصي ما في وسعك، ما دام حلال و صح. الكسل بيجيب كسل، و الشغل بيجيب شغل. علي الأقل هتكون هزمت شيطانك و نفسك الأمارة بالسوء و اتحركت و خدت خطوة .. فحتي لو السوق واقف، ربنا هيكرمك من عنده (برة حسابات البيزنس). " لو أنكم تتوكلون علي الله حَق توكله، لرزقكم كما يرزق الطير، تغدو خِماصا، و تعود بِطانا" – يعني الطير بيخرج علي لحم بطنه .. يرجع آكل و شبعان.
29 - المجتمع ظالم، التعليم ظالم، أصحاب الشركات كتير منهم ظلمة .. لكن ربنا مش بس عادل، ربنا هو العدل. اللي يحاول يقوللك إنك هتتعب و تتبهدل و تضيع في الآخر ماتضيعش وقت معاه، وفّر الأكسجين اللي هتضيعه في الكلام معاه و روح اعمل حاجة مفيدة.
30 – الكورسات أهم من الكتب. الكورسات – لو حاجة محترمة فعلا - فبتبقي فيها خلاصة كتب كتير و أبحاث + الخبرة العملية + انفعال المحاضر تأثيره أفضل في إنه يحركك عشان تاخد خطوة.
31 - كل الحاجات المفيدة اللي هيكون ليها أثر إيجابي علي حياتك المهنية و الدراسية .. كل الحاجات دي مش مريحة. كلنا عارفين ده. إعمل اللي ينجحك، مش اللي يريّحك .. اعمل الصحيح، مش المريح.
32- براين تريسي بيقول: Success is a Journey، و دي جملة صغيرة مفيدة أوي، معناها إن لحظة الإفطار بعد الصيام، لحظة استلام الكاس، أو لحظة تحقيق التارجت، أو لحظة تلقي مكالمة القبول في الانترفيو .. دي فعلا لحظات جميلة و سعيدة .. لكن المفروض إن التفاصيل الصغيرة كمان تكون فيها قدر من السعادة .. ولو مفهاش سعادة نهائيا، فحاول تراجع التفاصيل دي تاني، و تأكد إنك بتعملها صح، و تأكد إن نيتك صح.
33 - المؤلف الأمريكي (زيج زيجلر) بيقوللك:
“If you want to fly with the eagles, stop scratching with the turkeys’’
يعني لو عايز تطير مع النسور لفووق، يبقي عيب تقعد تنبش في الأرض مع الديكة (جمع ديك) .. بمعني أصح .. ابعد عن الناس اللي بتشدك لتحت، و اتلم علي الناس اللي سابقينك بمسافة.. ابعد عن اللي هيعطلك .. صدقني ابعد عنهم و ضميرك مرتاح ... كدة كدة هم أول ما هتجيلهم فرصة هيقلبوك، ابعد عن الناس اللي بيقولولك كلام يقلل منك، و يهز صورتك قدام نفسك. إبعد عن الناس الصفرا اللي وشهم بيتقلب لما تحصللك حاجة حلوة.
34 - خليك انتقائي في اللي بتسمع كلامه، ماتسمحش لحد يلوث دماغك بنصايح تافهة غير مبنية علي دراسة ولا خبرة. لو الشخص اللي بيسمم بدنك ده الوالد أو الوالدة .. مش هينفع تقاطعهم طبعا عشان بر الوالدين، لكن خليك شاطر و غيّر الموضوع، و حاول تتفهم إنهم بيحبوك بس بطريقتهم، بتعليمهم، بثقافة جيلهم، لو قرروا ياخدوا قرارات غلط في حقك، و فعلا متأكد إنها غلط بنسبة 100%، بعد استخارة المولي ثم استشارة المتخصصين .. لو قرروا فعلا يدمروك بقرارات غلط .. فلا تطعمها، و صاحبهما في الدنيا معروفا.
35 - لو عندك هموم رهيبة أو اكتئاب شديد أو إحباط تام و نفسك مسدودة عن كل حاجة مفيدة، ماتترددش في إنك تروح لطبيب نفسي. طبيب نفسي يعني دكتور خريج كلية الطب تخصص طب نفسي، مش عطار ولا واحد بيعالج بالأعشاب ولا بتاع تنمية بشرية و برمجة لغوية عصبية و الكلام ده. الطب عند الطبيب، و سيبك من شغل الدجل ده. عن تجربة، الطبيب النفسي ده أجمل إنسان ممكن تتعامل معاه، و مش دكتور مجانين ولا حاجة، و في الطب النفسي لا يوجد مصطلح اسمه (الجنون) اصلا، لما بيجيلك مغص أو تعب قولون بتروح لدكتور باطنة .. مخك و دماغك أولي و أهم بالطب، روح إعمل الصيانة الدورية عنده.
36 - الشغل بيجيب شغل، و قعدة البيت بتجيب مزيد من قعدة البيت، ابحث كويس عن وظيفة مناسبة و لو مالقتش اشتغل في حاجة أقل من طموحك، علي الأقل هتوفر نفقاتك ووارد تكون هي السبب في إنك تشتغل في مكان أفضل.
37- لو لسة طالب في الجامعة، و محتاج تنمي مهاراتك أو تعالج حاجة في شخصيتك، مفيش مانع تنضم للـ Student Activities لكن لمدة معينة و لهدف معين، إنك تروح تدريبات في بنوك و شركات، إنك تعالج الخجل الاجتماعي اللي عندك، إنك تتعلم الـ Public Speaking و الـ Leadership، إنك تفتح علاقات مع ناس ناجحين .. و هكذا.
38 – اشتغلت في الـStudent Activities و اتعلمت و استفدت؟ زي الفل. دور علي شغل بقي. شغل حقيقي بفلوس. لأن الـStudent Activities أهميتها في إنها (محاكاة للشغل)، يعني نموذج مصغر للشغل، تتعلم منه يعني تعامل مع بشر .. بالذات لو انت خارج من الثانوي و لسة بتستكشف الدنيا .. لكن دوّر علي وظيفة و اشتغل .. لأن الشغل أهم و أولي من (محاكاة الشغل).
39 – الأصل و الطبيعي و المعروف و الصح .. إن الطالب الجامعي – بالذات الرجل - بيشتغل. بس في مصر و بعض البلدان العربية كتير من الآباء بيتعامل مع إبنه إنه لسة في الشهادة الابتدائية، و يرفض إنه يشتغل .. و لا تتخيلوا قد ايه القرار ده بيضر الطالب/ الطالبة.
40 – ماتبررش، اعترف بأخطائك و كسلك و صارح نفسك بكل حاجة.
41 – احفظ القاعدة دي: Put it on paper, edit it later.. يعني خطط علي الورق، اكتب تفاصيل كتير، و إرجع اعمل بحث علي النت و شوف فيديوهات، و عدّل في خططك، و ضيف تفاصيل و شيل تفاصيل .. هي الخطط أصلا لازم تبقي مرنة.
42 – نصيحة مش هاتعجب ناس كتير:
خليك فى حالك
ده غير كم الناس الـ Phonies ( اللي بيدعوا نجاح و مهارة مزعومة) اللي موجودين علي الجروب ده .. أنا شوفت نفس بيعلنوا عن "قصص نجاحهم في إتقان الإنجليزي " و إنهم من الـ (ولا حاجة) إلي الـ (كل حاجة) و إلي مرحلة (تدريس الإنجليزي) في فترة قصيرة .. و إنهم الآن محاضرين ناجحين .. قولت أفتح فيديوهاتهم .. الأول افتكرتها الكاميرا الخفية .. لأن استحالة الهرتلة دي تكون بجد! و للأسف اتضح و الله إن فعلا الناس دول عايشين في فقاعة في عالم موازي، و كتير من الغلابة بيصدقوا.
43 – إسعي لإنك تكون من أشطر الناس في مجالك، و إسعي لإنك تكون من أعلي الناس أجرا في مجالك. و ده عن طريق اجتهادك في تخصصك، و دراستك لعلم الـ Marketing.
44 - لو عندك خجل اتخلص منه، و اتعلم إن الرفض في الوظيفة، و رفض اقتراحاتك، و رفض العملاء لشراء منتجك مش أمر شخصي .. لازم تدرب نفسك يبقي عندك تبلد عشان ضغطك و سكرك، و ده بيحتاج لتدريب ممكن تعمله انت في البيت لوحدك.
45 - حاول تفكر بطريقة أصحاب الشركات و مديريها. لو انت صاحب أو مدير الشركة مش هتقبل تشغل معاك غير أفضل ناس، و هتقول أصل دي مسؤولية و أمانة.
46 - لو انت مدير أو بتشتغل في الـ HR أو في إيدك توظيف، لازم تعرف إن حسن المظهر المطلوب للوظائف لا علاقة له بالوسامة أو الجمال. حسن المظهر معناه إن الملابس تبقي لائقة و مناسبة، و الاظافر قصيرة و نضيفة، و الشعر أو الشارب أو اللحية متهذبين، و بالنسبة للبنت إن الميك أب يبقي خفيف. بالنسبة للرجال البرفان يكون ريحته غير نفاذة (مسافة متر فقط)، و رائحة الفم غير نفاذة.
47 - لو مش عارف إيه المجال اللي عايز تدخل فيه أو تشتغل فيه أو تستثمر فيه، لازم تقرا عن كل المجالات، إقرا عن القصص الحقيقية للشركات اللي قامت من الصفر و نجحت. و اقرأ في المجالات المختلفة عشان تحدد المجال الأنسب ليك.
48 - مجالات الـ HR و الـ Training و الـ Customer Service و الـ Marketing و الـ Sales .. دي مش مجالات لصحابها بس، لازم دلوقتي أي حد هيبقي صاحب شركة أو مكتب أو محلات أو عيادة إنه يبقي ممتاز فيهم.
بيئة العمل المثالية pdf
ماذا تفعل عندما تكره عملك
مقابلات العمل الناجحة
كيف تبدع في عملك
أول أسبوع في العمل
أسئلة مقابلة عمل واجوبتها
إذا لم ترتاح في عملك
49 - بالنسبة لشهادات الكورسات، الموضوع فيه شوية تفاصيل:
كورسات اللغة الإنجليزية مفهاش حاجة اسمها شهادة معتمدة. الشهادة المعتمدة ليك هي مهارتك إنك تتكلم بطلاقة و تستوعب و تعرف تكتب و تقرأ كويس. لكن لو روحت انترفيو و معاك كومة شهادات و الانجليزي بتاعك بعافية ولا هينفعك.
• كورسات الكمبيوتر أغلبها ليها شهادات دولية، زي CCNA و MCSA و ICDL. دي شهادات دولية بكفاءتك.
كورسات العلوم الإدارية و المحاسبية بعضها له شهادات دولية من أماكن محددة بتحصل عليها بعد امتحان، زي ال HRIS و CMA و PMP، و الباقي لازم تروح تجرب بنفسك عشان تحكم.
• كورسات الـ IELTS و الـ TOEFL و امتحاناتهم ملهومش قيمة في حد ذاتهم. يعني مفيش حاجة اسمها اروح ادرس IELTS أو TOEFL عشان أبقي شاطر في الإنجليزي، لأ دي بتبقي شهادات مطلوبة لدراسات عليا أو وظيفة معينة أو هجرة أو سفر. لو مش مطلوبة منك ماتروحش تاخدها.
• مفيش حاجة إسمها مركز تدريب معتمد و شهادة معتمدة،
أي مركز تدريب بيشتغل بترخيص من التربية و التعليم أو الاستثمار أو الحي أو المحافظة أو أي جهة حكومية و بيدرب و بيدي شهادة في الآخر يبقي مركز معتمد و شهادته معتمدة.
50 - مفيش حاجة محترمة اسمها Oxford Training College ولا Cambridge Training College ولا Loughborough Training College، أنا عارف إنهم عاملين إعلانات مزروطة ومالية الدنيا، بس أقسم بالله دي ما كليات ولا ليها علاقة ببريطانيا ولا بالجامعات العريقة دي، و جهاز حماية المستهلك المصري حذر منهم.
51 - القصة بتاعة إنك تاخد كورس ب 1000 جنيه فتبقي مستشار تحكيم دولي، أو تبقي مستشار علاقات دبلوماسية، أو تبقي مستشار ملكية فكرية، و تاخد كارنيه و بادج لازاز العربية يحمل لقب (سيادة المستشار) و موقع عليه نقيب المحامين .. كل ده نصب في نصب في نصب. ولا معترف بيك كمستشار ولا ليك أي صفة قضائية. و نقيب المحامين اتبرأ من الكلام ده، و رئيس الجمعية اللي بتعمل الكورسات دي اتقبض عليه في 2014، و تم إخلاء سبيله بعد فترة، بدأ ينزلها تحت أسامي تانية، و اليوم السابع فتح تحقيق صحفي ممتاز في الموضوع ده.
52 - أنا عارف الكلام ده بيزعل ناس كتير من اللي شغالين فيه و معاهم شهاداته، بس أنا راجل في مجال التدريب بقالي سنين السنين، حاصل علي كورسات دولية من أكبر Trainers و جهات تدريبية في الولايات المتحدة في مجالات الـ Training و الـ Coaching، و متخصص 7 أفرع من علم النفس و الصحة النفسية و بقولك أقسم بالله - علميا - ما في حاجة اسمها (كورسات تنمية بشرية)، ولا (مدرب تنمية بشرية) .. الكلام ده في مصر و بعض دول العالم العربي فقط. و نزلت بوست مفصل عن الكلام ده.
53 - و انت بتقدم في وظيفة ماتبعتش الـ CV بدون الـ Cover Letter، إوعي تعملها.
54 – أقسم بالله إن الشركات محتاجة الناس أكتر ما الناس محتاجين للعمل .. الشاب محتاج العمل عشان ياخد ألفين تلاتة أربعة خمسة أو عشرة .. لكن الشركات محتاجة لراس مالها الحقيقي اللي هو الناس، لأنهم بيدخلولها ملايين، و بيحافظولها علي ملايين .. لكن هي الرأسمالية كدة، أو بمعني أصح هي الحياة كدة .. اللي معاه أكتر بيتحكم .. فهو بيقول: أقبل فلان و استبعد فلان .. و ده حقه. لكن صدق أو لا تصدق، أعرف شباب بيعملوا إنترفيوهات و يتقبلوا و يعتذروا عشان المرتب مش عاجبهم، و يتفاوضوا و ياخدوا اللي هم عايزينه. الفكرة فكرة عرض و طلب زي أي تجارة .. إنا محتاج منك كذا كذا ... و إنت عندك كذا كذا .. فهديلك مقابل.
بيئة العمل المثالية pdf
ماذا تفعل عندما تكره عملك
مقابلات العمل الناجحة
كيف تبدع في عملك
أول أسبوع في العمل
أسئلة مقابلة عمل واجوبتها
إذا لم ترتاح في عملك
بقلم المبدع / عمرو عيد