10 اسرار لنجاح محمد صلاح انت لا تعرفها
و أنا بتفرج على إجابات محمد صلاح في حواره الأخير، لقيتها مثال واضح جداً بيشرح ازاي شخص بيوصل لمرحلة ال Self Actualization أو تحقيق الذات و هي قمة هرم ماسلو للإحتياجات
Maslow Hierarchy of Needs1- Basic Needs الاحتياجات الأساسية
حاجة جسدية فسيولوجية زي الحاجة للأكل و الشرب و دي أول احتياج للإنسان لازم يشبعه عشان يدخل في المرحلة التانية.
2-Safety Needs الحاجة للأمان
مثل الحاجة لمسكن آمن،الحاجة لعمل يوفر ليه استمرارية الأكل و الشرب.
3-Social Needs الحاجة للتواصل الأجتماعي
بعد كدة يبدأ الإنسان يفكر في حاجته للتواصل مع الأصدقاء، تكوين أسرة و غيرها من العلاقات الإجتماعية.
4-Esteem Needs الحاجة لتقدير الذات
هنا بقى الشخص يبدأ يحتاج لثقة أكثر في نفسه، مكانة أعلى، وجاهة اجتماعية و احترام من الآخرين، اشباع ال Ego بتاعه.
5-Self Actualization- Self Fulfillment
تحقيق الذات
دي بقى آخر مرحلة و قمة الهرم بعد ما الإنسان بيُشبع كل احتياجاته شاملة الوصول لأعلى مستوى من الثقة في النفس و شعوره باحترام الآخرين،و خلاص كل ده مش شاغل تفكيره، بتبدأ عنده الحاجة للوصول لأقصى استغلال لإمكانياته و الوصول لمرحلة الإبداع و التأمل و يكون ليه هدف واضح في الحياة و رسالة، و كمان ماسلو وضّح بعض الصفات المشتركة بين الناس اللي بتوصل للمرحلة دي، منها انه بيكون :
تلقائي .. صادق مع نفسه .. واقعي .. مستقل في تفكيره و تصرفاته .. متعاطف مع الآخرين في المجتمع .. متصالح .
لو بصيت لكل الحوار و معظم إجابات صلاح هتلاقيها زي الوصف بالظبط و رغم إن أكيد طبعا الإجابات هو محضرها بس تظل صادقة و فيها تلقائية - ده إحساسي و رأيي الشخصي- و مش مهتم برأي الأغلبية و الناس هتقول عليه ايه على قد ما هو مهتم يوصل رأيه الشخصي.لما اتسأل عن أهمية جائزة البالون دور ..رد إنه بالنسبة له هو أحسن لاعب في العالم و هو مقتنع بكدة و خلاص مش محتاج جوائز تاني لإثبات ده بس أكيد هيفرح بيها برضه.
لما اتسأل عن المعجبين و الشهرة ..رد إنه خلاص بقى أهدى و بقى متفهم اهتمام الناس بيه و مش بيتضايق.
لما تطرق الحوار للسيارات اللي بيمتلكها و العقارات ..قال إنه مش بيحب يُظهر ممتلكاته و اللي بيعمل كدة بيحاول يثبت حاجة معينة لكن هو مش عايز و مش محتاج يعمل كدة.
لما اتسأل عن مشاريعه الاستثمارية المستقبلية ..رد إنه هيعملها في مصر، ليه مصر ؟ مش عشان مصر هي أمي و الوطن و مزايدات بالوطنية لإنه مش محتاج ينافق الناس، هو قال هيعمل ده عشان هو حاسس إنه هيعمل إضافة و حاجة هو شايف ان الناس في مصر محتاجة ليها فعلا و هو هيعرف يعملها كويس عشان شبهه و هي سلسلة صالات جيمانيزيوم Gym و مطاعم أكل صحي، مع إنه لو عمل أكاديمية رياضية مثلا هيكسب أكتر بكتير و مضمونة النجاح بس هو شايف انه كدة هيبقى بيدور على مكسب مادي فقط و ده مش هدفه.
و في مجمل الحوار كان بيتكلم بإيجابية تامة و تصالح مع كل الناس حتى اللي ضايقوه أو قاموا بإيذائه سابقاً و دي كلها حاجات بتؤكد نفس الفكرة.و أخيراً الجزء اللي أبهرني بصراحة، لما اتكلم عن إزاي هو بيلعب الماتش في عقله الأول - زي الشطرنج- و يفكّر هيعمل ايه و هيلعب ازاي و يفضل يكررها في دماغه كتير عشان لما يجي ينفذ ما يأخدش وقت في التفكير و نفس الكلام في ضربات الجزاء، بصراحة مش لاقي أي مثال احسن من ده عن وصف ال Self Actualization و هو انك ازاي تدرك و تستغل كل إمكانياتك.How to use and realize your full potential
وختاماً .. مش لازم تبقى مليونير أو ملياردير عشان توصل لمرحلة تحقيق الذات .. صحيح مش كتير اللي بيقدر يوصلها، لكن - في رأيي الشخصي - بمجرد ما توصل لمرحلة نجاح جيدة في حياتك العملية و حياتك الإجتماعية و تكون راضي بيها و تكون موضع احترام من الآخرين بأخلاقك و تعاملك مش بالمظاهر و السُلطة، أعتقد هتقدر توصل لمرحلة تحقيق الذات حتى لو مش بالتعريف الكامل الخاص بماسلو.