٦ فوائد لقراءة سورة البقرة يومياً
تعرف إنك لو وفرت 45 دقيقة بس من وقتك اللي بتضيعه على التليفون.. المواصلات.. بين المحاضرات او الدروس هيكونو بإذن الله سبب في انها تقلب حياتك 180 درجة ؟
عايز ربنا يرزقك بشغل او يباركلك في شغلك ؟
عايز تمنع او تتأكد من وجود الحسد والسحر؟
عايز البركة تحل بيتك ووقتك ومذاكرتك ؟
عايز ربنا يشفيك من مرض حتى لو مزمن؟
اكيد كل دا أو اللي بيدور في بالك يسير على ربنا عز وجل والدعاء والتوسل إليه والأخذ من الأسباب سبب في استجابة دعائك وواحدة من أضمن السبل دي هيا قراءة سورة البقرة يومياً.
بعض من فوائدها اللي ذكرها النبي صلى الله عليه وسلم :
١-سبب في استجابة الدعاء.
قال سعيد بن أبي هلال : ( بلغني أنه ليس من عبد يقرأ البقرة وآل عمران في ركعة قبل أن يسجد ثم يسأل الله شيئاً إلا أعطاه ).
٢- سبب طرد الشياطين من البيت.
قال النبي صلى الله عليه وسلم : ( لا تجعلو بيوتكم قبور، فإن البيت الذي تقرأ فيه سورة البقرة لا يدخلها شيطان ).
٣- سبب في تجنب أذى الجن.
كان فيه رجل صالح يشتكي من أذى الجن.. فوصّاه العلماء بقراءة سورة البقرة فلما قرأها ذهب أذى الحن بإذن الله.
٤- سبب في إن بيتك يتملي ملايكة.
قال النبي صلى الله عليه وسلم : ( البقرة سنام القرآن وذروته نزل مع كل آية منها ثمانون ملكاً).
٥- سبب في الوقاية السحر والحسد.
قال النبي صلى الله عليه وسلم : (اقرأو سورة البقرة فإن أخذها بركة وتركها حسرة ولا تستطيعها البطلة).
البطلة : يعني السحرة
٦-سبب في الارتقاء بالمسلم.
كان النبي صلى الله عليه وسلم يريد أن يؤمر على عليهم أمير...
فسألهم : " أيكم أكثر أخذاً بالقرآن الكريم؟"
فقال له رجل : " أنا أحفظ سورة البقرة. "
فقال له النبي صلى الله عليه وسلم : " أتحفظ سورة البقرة؟ "
قال : " أي والله يا رسول الله "
قال النبي صلى الله عليه وسلم : " اذهب... أنت أميرهم. "
هحكيلك ٣ قصص لناس حست بفرق بعد قرأة سورة البقرة :
القصة الأولى :
كان فيه تاجر كبير ومعروف وفجأه الشغل بتاعه وقف ..
حاول كتير يسترجع الشغل ويحاول من هنا وعمل خطط كتير لكن مفيش فايدة..
وبدأ بقراءة سورة البقرة يومياً..
وسبحان الله أيام قليلة ورجع الشغل والرزق تاني بفضل الله ثم بفضل قراءة سورة البقرة وأكيد كمان السعي وإنه خد بالأسباب
القصة الثانية :
كان في ست بتشتكي من السحر راحت لشيوخ كتير فيه شيخ أقنعها بقراءة سورة البقرة لحل مشكلتها والقيام..
اشتد عليها أذى الشيطان فبدأت بقراءة سورة البقرة يوميا فعلاً واستمرت عليه..
وبفضل الله بطل السحر فعلاً.. ورزقت بأبناء بعدها كمان بإذن الله.
القصتين اللي فاتو دول قالهم الشيخ الجبير في الشريط بتاعه
أما المفاجأه ان القصة التالتة قصتي :
كنت في أيام ويعني كان فيه تقصير مني في المذاكرة وكدا..
والله فيه مواد ما كنت فتحتها و ذاكرت يوم الامتحان على قد ما قدرت..
وأنا بقلب في الفيس يائسة قرأت بوست عن فضل سورة البقرة عجبني الموضوع وقولت يمكن ربنا يسهل عليا وبالفعل بدأت في قرأتها يوميا..
سبحان الله جات الإمتحانات ميسرة إلى حد ما و يعني كنت بحل حلو قولت هعدي بجيد جداً
امبارح النتيجة طلعت.. جبت امتياز اللهم بارك !!!
عشان كدا قررت اكتب المقال دا لعل وعسى إنها تكون سبب في حل مشكلة عند حد أو حتى مش شرط كدا هترفعك منازل في الجنة.
والحمد لله بدأت أواظب على قراءتها كل يوم وفي استمرار إن شاء الله.. وبالتكرار حفظت منها وبقت بتاخد أقل من نص ساعة.
وبكدا تكون عرفت فايدة قراءة سورة البقرة من استجابة للدعاء وطرد الشياطين والجن ونزول الملايكة وزيادة الرزق وقربك من الله وزيادة حسناتك فتزيد درجات في الجنة و حاجات كتير و شوفت ٣ قصص حقيقية لفضل قراءة سورة البقرة ..
مستني ايه!!
تاجر مع ربنا وانت الكسبان.
اقرا عن فن اللامبالاه من هنا