قد يعجبك

اترك وظيفتك بالطريقة الصحيحة

 اترك وظيفتك بالطريقة الصحيحة

اترك وظيفتك بالطريقة الصحيحة


من أصعب القرارات اللي ممكن ياخدها انسان في حياته، انه يقرر يسيب شغله اللي أفنى فيه سنين من عمره. و الموضوع حقيقي بيتطلب شجاعة كبيرة، و تفكير حكيم. 

مش كلنا عندنا رفاهية التفكير في الخروج من مكان ما لأنه مبيقدملناش التقدير الكافي ، و مبتكلمش عن التقدير المادي فقط.

أنا نفسي زمان كنت بشتغل في شركة ما و كنت بقبض رقم كبير نسبيا لاي حد في سني. و كان معاه بعض الامتيازات اللي تخليني اتعلق اكتر بالمكان. و لكن بيئة العمل المسمومة كانت كفيلة انها تخليني مش قادر استحمل من فرط الصراعات و الأعمال السفلية. حاولت ساعتها افرغ دة في اني اتفانى اكتر و ابذل مجهود اكتر، لكن للأسف دة مكنش كفاية و اتسبب في زيادة الضغط عليا، مش هتكسف اقول انها كانت بتوصل اني اروح البيت اعيط. و كان اي حد من اصدقائي يقولي انت في وظيفة اي حد في سنك يتمناها. و لكن اخدت القرار و مضيت عقد بديل اقل في الراتب و الامتيازات املا في بيئة صحية اكتر تكون نقطة انطلاق جديدة. 


من قبل سفري للدولة الجديدة، حسيت ان قبولي بعمل لا يليق بخبرتي و امكانياتي برضو كان قرار غلط. و اعتذرت عن السفر. و انا عامل البوست دة علشان اكيد كلنا بنمر بظروف قاسية في شغلنا و ضغوط كتير، و زملاء عمل ثعابين، و مدير صعب، و في نفس الوقت عندنا التزامات مقيدانا. و المقال دة خلاصة خبرتي الشخصية بمررهالك علشان لما تقرر الرحيل ماتندمش بعد كدة. و تدعيلي اني قدمتلك نصيحة متخسركش سنين من عمرك في اتجاه غلط.

#أولا لازم تحدد انت عايز ايه بالظبط. 

و دة ممكن تعرف إجابته لما تفكر في إجابة الأسئلة دي:

- ايه اللي بيحفزني؟ فلوس اكتر ؟ و لا بيئة عمل احسن؟ و لا تحدي مع شركة لسة بتبدأ و اكبرها بنفسي؟ و لا انا عايز استقرار زهقت من الفرهدة؟ ولا عايز اجرب بلد جديدة؟ .. فلو مثلا عايز فلوس كتير مقدمش في شركات فردية، و لو عايز بلد تانية مقدمش غير في البلد اللي استهدفها

- ايه هي نقاط القوة والضعف عندي؟ فلو عرفت نفسي كويس، و عرفت هدفي. هعرف محتاج اتعلم إيه، و هعرف ايه مش هيفيدني اقلل اهتمامي بيه. و ايه من مميزاتي اعمل عليه تركيز وانا ببني الPersonal Brand و مين من العلاقات اللي عندي يقدر يساعدني و اطلب مساعدته، ربنا يجعلنا كلنا أسباب لبعض و نكبر كلنا. و مين هيبعدني عن هدفي زي اصدقاء السوء فأخرج من دايرتهم

 ايه هو شغفي؟ و الشغف مش كلمة عايمة خالص، اقرا في الموضوع تاني، او اقعد مع كارير كوتش شاطر، و لو متعرفش حد قولي ارشحلك ناس قوية

- ايه هي أهدافي طويلة المدى؟ ركز في الاتجاه الصحيح لهدفك. يعني لو مثلا عايز تبقا مدير عام، مينفعش خطتك تتضمن انك تروح وظيفة Dead end زي Office Manager ملهاش ترقية في الإتجاه دة. او تعرف انك عايز تعمل Career Shift لمجال تاني، و تاخد كورسات في مجال تالت خالص. بمجرد أن يكون لديك فهم واضح للي انت عايزه ، ابدأ في عمل خطة تصلح لتحقيق هدفك.

- هل ادواتي جاهزة؟ اعمل دراسة لكل الشركات اللي ممكن يكون مطلوب تخصصي و تناسب فرص العمل بتاعتي و اعمل بروفايل على كل منصات التوظيف، واعمل ليست بكل ايڤنتات تخصصي او رجال الاعمال او مسئولي الموارد البشرية، و اعمل علاقات معاهم. اعمل بروفايل لينكدان قوي يجذب صناع القرار في الشركات دي و اتواصل معاهم و مع مسئولي التوظيف، ابني شبكة علاقات مع خبراء المجال، و اعمل سيرة ذاتية احترافية تليق بالمكان اللي هروحه، و اتأكد انها هتعدى ATS الموجود في الشركات دي و تقدمني بشكل يبين اد ايه ايه انا قوي في مجالي و اقدر اعمل انجازات. لو خبرتي كبيرة اكتب محتوى او اعمل كورس علشان الناس تعرفني بيه، لو مش عارف تعمل كل دة يبقا تكلم فريقنا يعملهولك من خلال اللينك دة https://wa.me/message/ZL2XXUFNVZNQG1

#ثانيا الخطوات الصغيرة هتوصلك

اترك وظيفتك بالطريقة الصحيحة


لو حسيت الموضوع كبير متهنجش، انا عارف Error404 دة كويس. قسم خطتك خطوات صغيرة زي ما انا قسمتلك المقال دة، و احتفل بكل خطوة صغيرة، و فرحني معاك مع كل انجاز، فرحتك بالخطوة الصغير هيطمنك انك قربت من هدفك خطوة، و ان الطريق صغر، و هيديك ثقة تشجعك للخطوة اللي جاية.

#ثالثا ابحث عن نظام دعم:

اغلب اللي حواليك بيتمنولك الخير، و ان انت تكون كويس. اعرف انك مش لوحدك. تواصل مع الأصدقاء والعائلة للحصول على الدعم النفسي. انضم إلى المجموعات المهنية في مجالك و اتعرف على ناس بنفس اهتماماتك واحضر الايڤنتات الخاصة بدة. شوف حد خبير اهل ثقة و ناجح و فاهم في المجال يكون مرشد ليك في خطواتك. و هنا ركز في نقطة مهمة. اهلك مش هيفهموا غالبا انت بتعمل ايه، فشاركهم حياتك الاجتماعية بس. حوارات الشغل و هدفك و خطتك شاركها مع الناس اللي فاهمين مجالك بس. و هديلك مثال تاريخي اثر على نفسيتي سلبيا كتير، انا عيلتي من ملوي - المنيا. فيها ناس كتير مهنتهم الزراعة، و زي انا عمري ما هفهم مواعيد الري و مواسم الحصاد و انواع الاسمدة و الكيماوي، هما كمان مفهموش لما قلتلهم انا حطيت كل فلوسي استثمار في منصة ذكاء صناعي للمستقبل هتاخد سنين على ماتتعمل، و سبحان الله اتصدمت لما واحد قاللي كنت اشتري بفلوسك عجول صغيرة و كبرها و بيعها. متحطش نفسك في الموقف دة ارجوك.


#رابعا ركز على الإيجابيات:

سهل اوي الوقوع في فخ سلبيات الوظيفة اللي احنا مش طايقينها دي ، لكن من المهم اننا كمان نشوف إيجابياتها.. دة كفاية ان هي اللي فاتحة بيوتنا. ممكن تكون اكتسبت مهارات قيمة أو أنشأت بعض الروابط الرائعة. حتى اسوأ وظيفة ممكن تكسب منها. انا في وظيفتي اللي حكيتهالكم فوق اكتسبت مهارة المناعة ضد كل انواع الخوازيق، بقيت محصن ضد الزعل منها. اخد الخازوق من هنا تلاقي وشي منور زي البدر ف تمامه، و دة طبعا بيساعدني اكون مركز و ميحيليش اي Panic فمتسرعش و اخد قرارات بدون دراسة بفعل التوتر الملازم للخازوق. الايجابيات دي ممكن تخليك عالاقل متحمس و شغال بايجابية و انت بتدور على حد غيرهم.. متشيلش في نفسك يا اخويا تطق ولا يحصلك حاجة، انت اللي هتخسر مش هم.


#خامسا اعتنِ بنفسك:

انزل الچيم و اقرا كتب و اتفسح و نام كويس و كل اللي يبسطك. النفسية اولا علشان تعرف تعمل شغلك بضمير و بتركيز و بروقان

في مرة مدير ليا زعل مني جدا لما قلتله اننا بنشتغل اصلا علشان نحسن حياتنا الاجتماعية مش العكس. الشغل هو الوسيلة مش الغاية. هيفيد بإيه الشغل لما حد من اهلك يتعب و متعرفش تبقا جنبه؟ او متحضرش عزا او فرح صاحب عمرك. احنا بنشتغل ليه؟

و انا نفسي هدفي الاسمى يكون عندي دخل ثابت مدى الحياة يكفي اني اتفسح مع مراتي و عيالي لما اتجوز و اخلف ان شاء الله، و الفلوس تيجي و انا بقطع اناناس تحت نخلة جوز هند في الباهاماس

اعرف ان شغلك وسيلة و لما تكبر مش هتندم غير عالوقت اللي فات عشان الوسيلة و انت بتضيع الغاية

بقلم أسامة شعبان قطب

لو عايز تعرف ازاي تعمل career shift المقال ده ممكن يساعدك من هنا

حابب تعرف ازاي تبني مهارات التواصل الفعال من هنا


تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -