ازاي تكون كاتب بوستات محترف فى 3 خطوات ؟
:محتويات القال
- يعني ايه كاتب بوستات؟
- خطوات كتابة محتوى السوشيال ميديا؟
- مواصفات قطعة المحتوى الناجحة
يعني ايه كاتب بوستات؟
مش غريب عليك تسمع مصطلح كاتب بوستات في حين أنك بتكتب محتوى على السوشيال ميديا. لسه في ناس كتير متعرفش أن كتابة البوستات بقي لي قواعد وأسس بيتكتب على أساسها. وعشان تكتب بوست نقدر نقول عليه محتوى سوشيال ميديا مش مجرد بوست هتحتاج تعمل شويه حاجات.
أولاً: لازم تهتم بالشكل العام للبوست أنه يكون بروفيشنال ومتضمن بعض الخطوات الرئيسية وبعضها فرعية ممكن نستغني عنها. ونتكلم عن الموضوع ده بإستفاضه في المقال.
ثانياً: لازم يكون في هدف من البوست اللي بتكتبه. يعني هدفك من البوست توعية جمهورك بالبراند بتاعك ولا انت بتقدم معلومة مفيدة لجمهورك ولا انت بتبيع منتج أو خدمة؟
ثالثاً: مين هم جمهورك اللي عايز توصله المحتوى بتاعك. لازم تحدد انت عايز مين يقرأ المحتوى اللي هتكتبه قبل م تبدأ في الكتابة لأن جمهورك هيحدد أنت هتكتب ايه. مينفعش تكلم شخص مهتم بالكورسات بنفس الطريقة اللي هتكلم بيها حد مهتم بالقهوة مثلاً.
رابعاً: المحتوي اللي هتكتبه هتنزله على أي منصة؟ فيسبوك اللي بتدعم البوستات الطويلة المكتوبة ولا انستجرام اللي بتدعم الصور والفيديو القصير أو يوتيوب اللي بتدعم الفيديوهات الطويلة.
خامساً: هتكلم جمهورك بأنهي نغمة صوت؟ صوت ودود كأنكو أصحاب ولا هتكلمه كشخص مهم وطريقة احترافية؟ طبعاً احنا لينا حرية الاختيار ولكن في حدود بتحددها طبيعة المجال اللي بتكتب فيه. وتقدر تدمج كذا طريقة تستخدمهم في المحتوي اللي بتقدمه بناءً على أفضل طريقة توصل بيها المعلومة لجمهورك.
دي خطوات أساسية لازم تكون في اعتبارنا قبل م نكتب واحنا بنكتب عشان تقدم محتوى قوي على السوشيال ميديا.
خطوات كتابة محتوى السوشيال ميديا؟
دلوقتي هقولك ازاي تكتب محتوي منظم وقوي. وعشان قطعة المحتوي اللي هتشتغل عليها تكون فيها أجزاء مكتملة ومترابطة هتكتب بالخطوات دي.
هتبدأ بالعنوان: في قاعدة أساسية فيها صفات العنوان الناجح وهي أنه يكون مفيد، مميز، محدد للغاية، ضروري. كل صفة من دول تتوفر في العنوان ال هتكتبه. يعني لازم يحدد أنت بتتكلم عن ايه ويكون مهم لعميلك. وضروري يكون مفيد لجمهورك بالدرجة الكافية أنه يجذب انتباهه ويكون مختلف عن المعتاد.
المقدمة: مهم تكون مختصرة وجذابة عشان القارئ يتشد ويحب يكمل قطعة المحتوى. المحتوى مهما كان قيم ومفيد لو مفيش انترو تخطفه وبداية مميزة تجذبه يكمل هيتجاهل كل المعلومات دي لأن مبقاش عنده شغف يكمل في بوست ممل.
جسم المحتوى: ده الجزء الأهم، الرسالة اللي أنت عايز توصلها لجمهورك عشان كده المهم طريقة العرض تكون مريحة للعين وسهلة ومنظمة. ممكن تقسمها على شكل ليست مرقمة أو تكتبها وتحاول تسيب مسافات بين كل فقرة وفقرة. ومهم تستخدم علامات الترقيم بشكل صحيح.
الملخص: في سطور قليلة لخص الفكرة العامة من المحتوى بتاعك عشان تتأكد أنها وصلت لعميلك بشكل واضح.
الخاتمة: ممكن تدمجها مع الملخص أو ممكن تستغنى عنها تماماً.
الدعوة للإجراء (cta):
ايه المطلوب من القارئ بعد م ينتهي من القراءة؟ ايه الأكشن اللي مستنيه يأخده؟ لايك، تعليق، شير، ينزل ابلكيشن ولا يحجز معاك أو يشتري. مهم جدا تطلب منه بشكل واضح وصريح بطريقة لطيفة أنت مستني منه ايه.
ممكن تستغني عن بعض الأجزاء لكن في أجزاء مينفعش نستغني عنها زي العنوان، المقدمة، جسم المحتوى واللإجراء المنتظر من العميل. دي خطوات كتابة قطعة المحتوى الناجحة على السوشيال ميديا.
:مواصفات قطعة المحتوى الناجحة
طب هل بعد كل ده ممكن القطعة اللي كتبتها متكونش ناجحة؟
:اه ممكن و ده هيحصل لو مهتمتش
- تكتب قطعة محتوى مناسبة لجمهورك
- .القطعة تكون سهلة القراءة والفهم.
- تكون أجزائها مترابطة ومتماسكة.
- تتضمن هدفك اللي عايز توصله منها بوضوح.
- أجزاء قطعة المحتوى تكون واضحة وكاملة.
- تهتم تنزلها في التوقيت والمكان المناسبين لمحتواك ولجمهورك.
أعتقد أنت دلوقتي جاهز تبدأ تكتب أول قطعة محتوى ليك بصورة احترافية. متنساش تطبق كل الخطوات دي وتستمر في الكتابة لأن أهم من الكتابة بأفضل طريقة هي التدريب الكتير على الكتابة عشان توصل لأفضل أسلوب لكتابتك.
وللمزيد من المقالات عن مهارة الكتابة يمكن الإطلاع عليها من هنا
أدوات تساعدك على كتابة المحتوى من هنا
خلاصة دورات كتابة المحتوى من هنا
كتابة محتوى نموذج تسويقي
نموذج كتابة محتوي
دورات كتابة المحتوي
كورس إدراك كتابة محتوي
وظيفة كتابة محتوى
كتب بواسطة: أسماء أشرف